‘उद्धव ठाकरे गौतम अदानी यांचं विमान वापरायचे’, मोहित कंबोज यांचा मोठा आरोप

मुंबई | 17 डिसेंबर 2023 : ठाकरे गटाचे प्रमुख उद्धव ठाकरे यांनी धारावी विकास प्रकल्पाच्या मुद्द्यावरुन उद्योगपती गौतम अदानी आणि सत्ताधारी भाजपच्या विरोधात जोरदार मोर्चा सुरु केलाय. उद्धव ठाकरेंनी अदानी उद्योग समूहाच्या विरोधात धारावी ते बीकेसीपर्यंत भव्य पायी मोर्चादेखील शनिवारी (16 डिसेंबर) काढला. त्यांनी मोर्चानंतर केलेल्या भाषणात भाजप आणि उद्योगपती गौतम अदानी यांच्याविरोधात सडकून टीका केली. उद्धव ठाकरेंच्या टीकेनंतर भाजप नेते मोहित कंबोज यांनी काल रात्री एक ट्विट केलं. या ट्विटमध्ये त्यांनी उद्धव ठाकरेंवर गंभीर आरोप केला. “उद्धव ठाकरेंना अदानींकडून 10 अब्ज रुपयांची वसूली करायची आहे. उद्धव यांना दुबईत हॉटेल खरेदी करायचं आहे, ज्याचं डील काही दिवसांपूर्वी छोटे ठाकरेंनी केली आहे”, असा धक्कादायक दावा मोहित कंबोज यांनी ट्विटवर केला आहे. त्यानंतर त्यांनी पुन्हा उद्धव ठाकरेंबद्दल मोठा दावा केला आहे.

“उद्धव ठाकरे उद्योगपती गौतम अदानी यांच्या खासगी विमानाचे वापर करायचे. ठाकरेंनी दिल्ली आणि संभाजीनगरला जाण्यासाठी अदानींचं विमान वापरलं होतं. विमान वापरल्याचे पैसे दिले नाहीत”, असे आरोप मोहित कंबोज यांनी केले आहेत. “धारावी पुनर्विकास प्रकल्पात कमिशन मिळवण्यासाठीच ठाकरेंचा अदानींना विरोध होतोय”, असाही आरोप मोहित कंबोज यांनी केलाय. मोहित कंबोज यांचा व्हिडीओ समोर आला आहे. या व्हिडीओत त्यांनी उद्धव ठाकरेंवर टीका केलीय.

मोहित कंबोज व्हिडीओत नेमकं काय म्हणाले?

“उद्धवजी या मागचं कारण काय आहे ते तर सांगा. गौतम अदानी कालपर्यंत तुमचे प्रिय मित्र होते. तुम्ही एकमेकांचे मित्र होते. अदानी तुमच्या घरी यायचे, तर कधी तुम्ही अदानींच्या घरी जायचे. आता तुम्ही त्यांचे एवढे विरोधक कसे बनले?”, असा सवाल मोहित कंबोज यांनी केला. “उद्धव ठाकरे आणि त्यांच्या कुटुंबियांनी अनेक वेळा गौतम अदानी यांच्याकडून फायदा करुन घेतलाय. तर मग आता कोणत्या टीडीआरच्या माध्यमातून वसुली पाहिजे की मातोश्री 3 बनवायचं आहे?”, असा खोचक सवाल मोहित कंबोज यांनी केला.