महिला सुरक्षा ते अंडरवर्ल्डचा खात्मा, मुंबईच्या नव्या पोलिस आयुक्तांचा ‘अॅक्शन प्लॅन’

मुंबई : राज्य सरकारने मुंबई पोलिस आयुक्तपदी परमबीर सिंह यांची नियुक्ती केली. यानंतर परमबीर सिंह यांनी पत्रकार परिषद घेत राज्य सरकारचे आभार मानले आहेत (Mumbai Police Commissioner Parambir Singh). तसेच यापुढील काळात कशा पद्धतीने काम करणार आहे याची माहिती दिली. यावेळी त्यांनी अंडरवर्ल्डवर नियंत्रण आणण्यासोबतच महिला सुरक्षेवरही भर असेल असं स्पष्ट केलं.

परमबीर सिंह म्हणाले, “राज्य सरकारने माझी मुंबई पोलिस आयुक्त पदावर नियुक्ती केली. हा माझा मोठा सन्मान आहे. या पदावर अनेक मान्यवरांनी काम केलं आहे. त्यासाठी माझ्यावर विश्वास दाखवल्याबद्दल मी राज्य सरकारचे आभार मानतो. मुंबईत कायदा सुव्यवस्थेची स्थिती चांगली आहे. तिच यापुढेही राहिल यासाठी प्रयत्न करेल. रस्त्यांवरील गुन्ह्यांवर अंकुश ठेवण्यालाही आमचं प्राधान्य राहिलं. महिलांची सुरक्षा हा अधिक प्राधान्य असलेला विषय आहे. दिवस असो की रात्र महिलांना सुरक्षित वाटायला हवं.”

मागील काळात अंडरवर्ल्डविरोधात चांगलं यश मिळालं आहे. त्यावर पुढे काम करणं आणि जे काही उरले सुरले गुन्हेगार आहेत त्यांच्यावरही नियंत्रण मिळवण्याला प्राधान्य राहिल. मी मुंबई पोलिसांसोबत आधीही काम केलं आहे. संपूर्ण मुंबई पोलिसांचं कुटुंब माझ्यासोबत राहिल. मुंबई पोलिस जगातील उत्कृष्ट पोलिसांपैकी एक आहेत. मुंबई कोणत्याही आव्हानाला सामोरे जाण्यास सक्षम आहेत. या शहराला आम्ही एक चांगली सुरक्षा व्यवस्था देऊ, असंही परमबीर सिंह यांनी नमूद केलं.

परमबीर सिंह म्हणाले, “आधीचे आयुक्त संजय बर्वे यांनी शहरातील कायदा सुव्यवस्था ज्या पद्धतीने सांभाळली तिच पद्धत पुढे नेऊ. महिलांच्या 24 तास सुरक्षेसह अंडरवर्ल्डमधील गुन्हेगारीवरही नियंत्रण ठेऊ. अंडरवर्ल्डबाबत जे काही बाकीचे घटक आहेत त्यावरही काम करु.”

मुंबईत सध्या कुठलं रॅकेट सुरु आहे असं मला वाटत नाही. मुंबई पोलिसांची टिम चांगलं काम करते आहे. एझाज लकडावाला प्रकरणामध्ये तपास सुरु राहिल, असंही परमबीर सिंह यांनी सांगितलं.

संबंधित बातम्या :

Mumbai Police Commissioner Parambir Singh