यांना आता जाग का आली?, सेटलमेंटसाठी मोर्चा काढला काय? ; राज ठाकरे यांचा ठाकरे गटावर घणाघात

मुंबई | 18 डिसेंबर 2023 : मनसेची आज आढावा बैठक होत आहे. या बैठकीनंतर मनसे अध्यक्ष राज ठाकरे यांनी माध्यमांशी संवाद साधला तेव्हा शिवसेना उद्धव बाळासाहेब ठाकरे गटाच्या भूमिकेवर राज ठाकरे यांनी निशाणा साधला. धारावी रिडेव्हलपमेंट प्रोजेक्ट अदानी ग्रुपकडे देण्याला ठाकरे गटाने विरोध केला आहे. त्यासाठी ठाकरे गट रस्त्यावर उतरला. ठाकरे गटाचे प्रमुख उद्धव ठाकरे आणि आदित्य ठाकरे यांच्यासह अन्य शिवसैनिकांनी मोर्चा काढला. यावर राज ठाकरे यांनी भाष्य केलं आहे. यांना आता जाग का आली? सेटलमेंटसाठी मोर्चा काढला काय?, असा सवाल राज ठाकरे यांनी विचारला आहे.

राज ठाकरे काय म्हणाले?

एक मोठा प्रकल्प मुंबईत येतो आहे. हा प्रकल्प अदानींना का दिला? अदानींकडे असं काय आहे? की विमानतळपण तेच हाताळू शकतात.कोळसा प्रकल्पही तेच हाताळू शकतात असं यांच्याकडे काय आहे? टाटांपासून इतरही लोक उद्योगात आहेत. त्यांच्याकडून डिझाईन मागवू शकत होते. टेंडर मागवू शकत होते. पण ते झालं नाही. अदानी ग्रुपच्या पदाधिकाऱ्यांशीही बोलणं झालं होतं. मी त्यांना म्हटलं की तुमच्याकडचं डिझाईन दाखवा. महाविकास आघाडीच्या लोकांना आज का जाग आली? हे सगळं जाहीर होऊन आठ- दहा महिने झाले असतील. मग यांनी आज का मोर्चा काढला?, असा सवाल राज ठाकरे यांनी विचारला आहे. मुंबई महापालिकेची निवडणूक कधी होणार? असा प्रश्न विचारण्यात आला. तेव्हा मेरी मर्जी, असं राज ठाकरेंनी म्हटलंय.

ठाकरे गटाचा मोर्चा

धारावीच्या पुनर्विकासाचा प्रकल्प हाती घेण्यात आला आहे. तो प्रकल्प अदानी ग्रुपला देण्याला ठाकरे गटाने आणि महाविकास आघाडीतील नेत्यांनी विरोध केला आहे. ठाकरे गटाकडून मोर्चाही काढण्यात आला. यावर राज ठाकरे यांनी प्रतिक्रिया दिली आहे.

आज धारावीकरांच्या न्याय्य हक्कासाठी निघालेल्या विराट मोर्च्यात सहभागी झालो आणि पुन्हा एकदा हे जाणवलं की, जेव्हा जेव्हा मुंबईवर संकटं येतात, तेव्हा तेव्हा मुंबईकर एकजुटीनं संकटं परतावून लावतोच!

धारावीचा लढा हा फक्त धारावीकरांचा नसून साऱ्या मुंबईकरांचा आहे, मुंबईच्या रक्षणासाठीचा… pic.twitter.com/tVb2ceLkD6

— Aaditya Thackeray (@AUThackeray) December 16, 2023

मनसेची आढावा बैठक

मनसेची लोकसभेची तयारी सुरू आहे. आज राज ठाकरे यांनी आढावा बैठक घेतली. मुंबईतील MIG क्लबमध्ये आज मनसेची लोकसभा आढावा बैठक पार पडली. राज ठाकरे 22 लोकसभा मतदार संघांचा आढावा घेतला. मुंबई, नाशिक, पालघर, रायगड, पुणे, विदर्भ मराठवाड्यातील लोकसभा मतदारसंघांचा राज ठाकरेंनी आढावा घेतला.