कोरोनावर मात, पण खासगी रुग्णालयाचा डायलिसिसला नकार, 15 वर्षीय मुलाचा मृत्यू

नवी मुंबई : कोरोनावर मात केलेल्या एका 15 वर्षीय मुलाचा डायलिसिस न केल्यामुळे मृत्यू झाला आहे (New Mumbai Corona Cases). ही धक्कादायक घटना नवी मुंबईच्या सानपाडा सेक्टर 5 परिसरात घडली. मृत मुलाला कोरोनावर मात केल्यानंतर 13 मे रोजी रुग्णालयातून डिस्चार्ज मिळाला होता. या मुलाची 15 मे रोजी डायलिसिस होणे गरजेचे होते. मात्र, शहरातील इतर रुग्णालयांनी सहकार्य न केल्याने बालकाचा मृत्यू झाल्याचा आरोप मुलाच्या कुटुंबीयांनी केला आहे (New Mumbai Corona Cases).

वाशी येथील मनपा रुग्णालयाचं रुपांतर कोविड 19 रुग्णालयात करण्यात आलं आहे. त्यामुळे तेथील डायलिसिस सेंटर बंद आहे. खाजगी रुग्णालयांत डायलिसिसची विचारणा केली असता दोन टेस्ट निगेटिव्ह आल्याचे अहवाल खाजगी रुग्णालयाकडून मागवण्यात आले. जोपर्यंत दुसऱ्या टेस्टचा अहवाल निगटिव्ह येत नाही तोपर्यंत डायलिसिस करण्यास खाजगी रुग्णालयांनी नकार दिला.

शेवटी बेलापूर येथील रुग्णालयाने डायलिसिस करण्याची तयारी दर्शवली. मात्र त्यापूर्वीच मुलाचा दुर्देवी मृत्यू झाला. शहरातील इतर रुग्णालयांनी सहकार्य न केल्याने बालकाचा मृत्यू झाल्याचा आरोप मुलाच्या कुटुंबीयांनी केला आहे. एकूणच काय तर या मुलाने कोरोनाला तर हरवले. मात्र, तरीही रुग्णालयांच्या असहकार्यामुळे मुलाची झुंज अपयशी ठरली.

दरम्यान, राज्यात कोरोनाचे दररोज नवे रुग्ण आढळत आहेत. त्यामुळे ज्या रुग्णांना नियमित डायलिसिसची आवश्यकता आहे त्यांच्या उपचारात अडथडा येत असल्याची माहिती समोर येत आहे. काही ठिकाणी डायलिसिसिसाठी कोरोनाची चाचणी करणं बंधनकारक केलं आहे. त्यामुळे रुग्णांचे हाल होत आहेत.