अनेकांना करोडोंचा गंडा घालणारा मुंबईचा नटवरलाल अखेर शिवाजीपार्क पोलिसांच्या तावडीत

मुंबई : दादर परिसरात काही एजंटशी हातमिळवणी करुन गंडा घालणाऱ्या टोळीचा म्होरक्या विष्णु महिपत जाधवला अखेर शिवाजीपार्क पोलिसांनी अटक केलीये. शिवाजीपार्क पोलीस स्टेशन ( Shivaji Park Police Station ) समोर असलेल्या नवलकर इमारतीचा लॅन्डलॉर्ड विष्णु महिपत जाधव ( Vishnu Jadhav ) याने अनेक लोकांना कोट्यवधीचा गंडा घातला आहे. इमारतीचा लॅन्डलॉर्ड विष्णु महिपत जाधवने इमारतीच्या पुनर्विकासाचे स्वप्न दाखवून २०१८ साली १४ लोकांना २ कोटी ३४ लक्ष ६८ हजार रुपयांना गंडा घातला. त्या संदर्भात एफआयआर १५९/१८ कलम ४२० भादवी शिवाजीपार्क पोलिसात नोंद देखील आहे.

जामीनावर बाहेर येताच विष्णु जाधवने लोकांना गंडा घालण्याचा धंदा पुन्हा वेगाने सुरु केला. माहिम पोलीस स्टेशन परिसरात सुद्धा चेक बाऊन्स प्रकरणी विष्णु जाधव विरुद्ध कलम १३८ अंतर्गत गुन्हा दाखल आहे. बरेच दिवस पोलिसांच्या हातवर तुरी देऊन फरार असलेला विष्णु जाधव मोठ्या शिताफीने शिवाजीपार्क पोलिसांनी पकडून आणला.

दादर परिसरातील महिलेला ३७ लाखांना फसवल्याप्रकरणी ९ जुन २०२३ रोजी विष्णु जाधव विरोधात ४२०,४०६,४०९ कलमाखाली गुन्हा दाखल आहे. दादर परिसरात अनेकांची या प्रकरणी फसवणुक झाली असुन अनेक जण पोलिसात धाव घेत आहेत. तरी विष्णु जाधव आणि भुरट्या एजंटपासुन सावध राहण्यासंदर्भात आवाहन करण्यात येत आहे.