नाशिकमध्ये 7 नगरपरिषदांच्या निवडणुका; प्रभाग रचना 5 एप्रिलला होणार प्रसिद्ध, कसा आहे कार्यक्रम?
राज्य निवडणूक आयोगाचे सचिव किरण कुरुंदकर यांनी राज्यातील मुदत संपलेल्या एकूण 208 नगरपरिषदांच्या निवडणुकांसाठी प्रभाग रचना कार्यक्रम जाहीर केलाय. त्यात अ वर्गातील 83, ब वर्गातील 68 आणि क वर्गातील 120 नगरपरिषदा आहेत. यामुळे नाशिक जिल्ह्यातील मनमाड, सिन्नर, येवला, भगूर, नांदगाव, सटाणा आणि चांदवड या नगरपरिषदांची निवडणूक होणार आहे.
नाशिकः नाशिक (Nashik) महापालिकेच्या पाठोपाठ आता जिल्ह्यात पुन्हा एकदा 7 नगरपरिषदांच्या निवडणुकांची रणधुमाळी रंगणार आहे. राज्य निवडणूक आयोगाचे (State Election Commission) सचिव किरण कुरुंदकर यांनी राज्यातील मुदत संपलेल्या एकूण 208 नगरपरिषदांच्या निवडणुकांसाठी प्रभाग रचना (Ward formation) कार्यक्रम जाहीर केलाय. त्यात अ वर्गातील 83, ब वर्गातील 68 आणि क वर्गातील 120 नगरपरिषदा आहेत. यामुळे नाशिक जिल्ह्यातील मनमाड, सिन्नर, येवला, भगूर, नांदगाव, सटाणा आणि चांदवड या नगरपरिषदांची निवडणूक होणार आहे. महापालिका निवडणुकांचा बार उडाल्यानंतर साधारणतः जून महिन्यांमध्ये या निवडणुका होण्याचा अंदाज व्यक्त केला जात आहे.
कसा आहे कार्यक्रम?
येत्या 2 मार्च ते 5 एप्रिल दरम्यान प्रभाग सीमांची प्रसिद्धी, हरकती, सूचना मागवून त्यावर सुनावणी घेण्यात येईल. प्रभागांची संख्या, अनुसूचित जाती, जमातीची 2011 च्या जनगणनेनुसार लोकसंख्या, क्षेत्र, सीमांकन, नकाशा ही माहिती 2 मार्चपर्यंत सादर करावी लागेल. त्याला 7 मार्च रोजी राज्य निवडणूक आयुक्त मान्यता देतील. यावरच्या हरकती आणि आक्षेप 10 ते 17 मार्चपर्यंत नोंदवता येतील. त्यावर 22 मार्च रोजी सुनावणी होईल. याचा अहवाल जिल्हाधिकारी 25 मार्चपर्यंत राज्य निवडणूक आयुक्तांना पाठवतील. त्यानंतर 1 एप्रिलला अंतिम प्रभाग रचनेला मान्यता देण्यात येईल. ही माहिती 5 एप्रिल रोजी अधिकृतपणे प्रसिद्ध केली जाईल. नगरपरिषदांच्या वेबसाईट आणि स्थानिक पातळीवर ही माहिती पाहायला मिळेल.
कुठे कोणाचे वर्चस्व?
नाशिक जिल्ह्यातील निवडणुका होणाऱ्या 7 नगर परिषदांपैकी 4 नगरपालिकांवर शिवसेना, 2 नगरपालिकांवर भाजप आणि 1 नगरपालिकेवर काँग्रेसचे वर्चस्व होते. सटाण्यात एकूण 21 सदस्य आहेत. तिथे भाजप-शहर विकास आघाडीची सत्ता होती. नगराध्यक्षपदी शहर विकास आघाडीचे सुनील मोरे, तर उपनगराध्यक्षपदी भाजपचे दीपक पाकळे होते. चांदवड नगरपालिकेवर काँग्रेसचा दबदबा होता. येथे 17 सदस्य आहेत. नगराध्यक्षपदी रेखा गवळी, तर उपनगराध्यक्षपदी राजेंद्र शेलार होते. येवल्यात एकूण 24 सदस्य आहेत. येथे नगराध्यक्षपदी भाजपचे बंडू क्षीरसागर आणि उपनगराध्यक्षपदी शिवसेनेचे सुरेश पटणी आहेत.
4 ठिकाणी शिवसेना
नांदगावमध्ये एकूण 17 सदस्य आहेत. येथे शिवसेनेचे राजेश कवडे हे नगराध्यक्ष आणि कारभारी शिंदे उपनगराध्यक्ष होते. सिन्नर नगरपालिकेत 28 सदस्य आहेत. येथे शिवसेनेचे किरण डगळे नगराध्यक्ष आणि बाळासाहेब उगले उपनगराध्यक्ष होते. मनमाडमध्ये एकूण 31 सदस्य आहेत. येथे शिवसेनेच्या पद्मावती धात्रक नगराध्यक्ष, राजेंद्र आहिरे उपनगराध्यक्ष होते. भगूर येथे 17 सदस्य आहेत. येथे शिवसेनेच्या अनिता करंजकर नगराध्यक्ष आणि सुरेश वालझाडे उपनगराध्यक्ष होते.
इतर बातम्याः
पब्लिक सब जानती है, कोणावर कशी कारवाई होते, काही लोक भाजपमध्ये का गेले?; भुजबळांचा राणेंना टोला
‘राष्ट्रवादी’कडून इच्छुकांची चाचपणी; नाशिकमध्ये महापालिका निवडणुकीचे पडघम जोरात
शिवजयंतीच्या मुहूर्तावर केबल कार्पोरेशन ऑफ इंडिया कंपनीचे उद्घाटन; नाशिकमधून परदेशात होणार निर्यात
