उमरग्याचे ठाकरेंचे आमदार प्रवीण स्वामी यांची आमदारकी धोक्यात? नेमकं प्रकरण काय?

उमरग्याचे शिवसेना उद्धव बाळासाहेब ठाकरे पक्षाचे आमदार प्रवीण स्वामी यांची आमदारकी धोक्यात आहे का? अशी चर्चा आता राजकीय वर्तुळात होत आहे. त्यामागील कारणही अगदी तसंच आहे. शिवसेनेचे माजी आमदार ज्ञानराज चौगुले यांनी आमदार प्रवीण स्वामी यांच्या विरोधात जात वैधता प्रमाणपत्रावर याचिका दाखल केली आहे. उमरगा विधानसभा मतदारसंघाचे आमदार प्रवीण स्वामी यांच्या जातीचे प्रमाणपत्र आणि वैधता प्रमाणपत्र रद्द करण्याची मागणी याचिकेतून करण्यात आली आहे. याबाबत मुंबई उच्च न्यायालयाच्या संभाजीनगर खंडपीठात याचिका दाखल करण्यात आली आहे.

या प्रकरणी दाखल करण्यात आलेल्या याचिकेवर फेब्रुवारीमध्ये सुनावणी होणार असल्याची माहिती आहे. विधानसभेच्या निवडणूकीतील पराभूत उमेदवार माजी आमदार ज्ञानराज चौगुले यांनी या याचिकेसह प्रवीण स्वामी यांच्याविरुद्ध इलेक्शन पिटीशनही दाखल केली आहे. चौगुले यांनी निवडणुकीचे निर्णय आणि तांत्रिक बाबींवर 16 2025 या क्रमांकाची इलेक्शन पिटीशन दाखल केली आहे.

याप्रकरणी उद्धव बाळासाहेब ठाकरे शिवसेनेचे उमरग्याचे आमदार प्रवीण स्वामी यांना संभाजीनगर उच्च न्यायालयाकडून नोटीस देण्यात आली आहे. उमरगा विधानसभा मतदारसंघ आरक्षित असल्याने या ठिकाणी प्रवीण स्वामी यांना संधी मिळाली आहे. त्यांनी विधानसभा निवडणुकीत शिवसेनेचे तत्कालीन आमदार ज्ञानराज चौगुले यांचा पराभव केला होता.

अटीतटीच्या लढतीत प्रवीण स्वामी विजयी

उमरगा विधानसभा मतदारसंघाची 2024 निवडणूक अतिशय अटीतटीची ठरली. अटीतटीच्या या लढतीत हे प्रवीण स्वामी 94550 मते घेऊन विजयी झाले. तर ज्ञानराज चौगुले यांना 91142 मतांवर समाधान मानावं लागलं. विशेष म्हणजे चौगुले या मतदारसंघात सलग तीन वेळा जिंकून आले होते. असं असताना त्यांना धूळ चारण्यात प्रवीण स्वामी यशस्वी झाले. पण आता चौगुले यांनी त्यांच्या आमदारकीवर आक्षेप घेतल्याने या प्रकरणाकडे आता राज्याचं लक्ष केंद्रीत होणार आहे. आगामी काळात या प्रकरणात महत्त्वाच्या घडामोडी घडण्याचे संकेत मिळत आहेत.