मंगळसूत्र आमचं आणि घरोबा दुसऱ्याशी, संजय राऊत यांच्यावर या नेत्याने केली सडकून टीका
महसुलमंत्री राधाकृष्ण विखे पाटील यांनी खासदार संजय राऊत यांना जोरदार प्रतिउत्तर दिलं. संजय राऊत यांच्या डोक्यावर परिणाम झालाय.
अहमदनगर : आता महाविकास आघाडीत (Mahavikas Aghadi) तुमची काय परिस्थिती आहे. तुम्हाला ते नांदवायला तयार नाही. तुमच्या वज्रमुठेला आत्ताच तडे गेले आहेत. उद्या तुम्हाला ते सोडणार नाही याची काळजी घ्या, असा सल्ला राधाकृष्ण विखे पाटील (Radhakrishna Vikhe Patil) यांनी संजय राऊत यांना दिला. संजय राऊत (Sanjay Raut) यांच्या टीकेला राधाकृष्ण विखे पाटील यांनी जोरदार प्रतिउत्तर दिलं. संजय राऊत यांनी विखे पाटलांच्या वक्तव्यावर टीका केली होती.
तुम्हाला त्याचा विसर पडलाय
महसुलमंत्री राधाकृष्ण विखे पाटील यांनी खासदार संजय राऊत यांना जोरदार प्रतिउत्तर दिलं. संजय राऊत यांच्या डोक्यावर परिणाम झालाय. त्याचे हे उत्तम उदाहरण आहे. तुम्हीच भाजपाचे मंगळसूत्र घातले होते. तुम्हाला त्याचा विसर पडलाय. लग्न करून मंगळसूत्र आमचं घालायचं आणि घरोबा दुसऱ्याबरोबर करायचा हे तुम्ही केलं, असा घणाघात विखे पाटील यांनी संजय राऊत यांच्यावर केला.
या सरकारची चिंता सोडून द्या
संजय राऊत यांच्या भंपक विधानाला उत्तर द्यायची गरज नाही. एकनाथ शिंदे यांच्या रुपाने कार्यक्षम मुख्यमंत्री लाभले आहेत. आत्ता आणि २०२४ लाही सरकार आमचंच असेल. या सरकारला पंतप्रधान मोदी यांचे पाठबळ आहे. या सरकारची चिंता सोडून द्या.
संजय राऊत यांनी अन्य व्यवसाय शोधावा. त्यांचे दिवस आता भरत चाललेत, असा टोला विखे पाटील यांनी लगावला. राऊत यांच्या सरकारचं डेथ वॉरंट वक्तव्यावरून विखे पाटील यांनी चांगलाच पलटवार केलाय.
संजय राऊत यांच्या डोक्यावर परिणाम झालाय
देवेंद्र फडणवीस हे आमच्या मनातले मुख्यमंत्री असल्याचं म्हटलं गेलं. त्यावर संजय राऊत म्हणाले, तुमच्या मनातले मुख्यमंत्री असतील तर बसवा. तुम्हाला कुणी अडवलं, असंही संजय राऊत यांनी म्हंटल होतं. त्यावर बोलतना विखे पाटील म्हणाले, सगळे लोकं म्हणतात की, संजय राऊत यांच्या डोक्यावर परिणाम झालाय. त्याचं हे उत्तम उदाहरण असल्याचा टोला विखे पाटील यांनी संजय राऊत यांना लगावला.
