ऑक्सिजनचा सिलेंडर, बोटाला ऑक्सीमीटर, गिरीश बापट व्हिलचेअरवर बसून प्रचाराच्या रणधुमाळीत
कसब्याच्या पोटनिवडणुकीसाठी भाजप खासदार गिरीश बापट (Girish Bapat) हे थेट व्हिलचेअरवर बसून प्रचाराच्या मैदानात उतरले आहेत. त्यामुळे ही निवडणूक आता किती प्रतिष्ठेची बनलीय हे स्पष्ट दिसतंय.
मुंबई : पुण्यातील कसबा (Kasba) आणि चिंचवडची (Chinchwad) पोटनिवडणूक अतिशय प्रतिष्ठेची बनली आहे. विशेष म्हणजे कसब्याच्या पोटनिवडणुकीसाठी भाजप खासदार गिरीश बापट (Girish Bapat) हे थेट व्हिलचेअरवर बसून प्रचाराच्या मैदानात उतरले आहेत. गिरीश बापट हे आजारी आहेत. त्यांच्यावर सध्या रुग्णालयात उपचार सुरु आहेत. पण असं असताना देखील पक्षासाठी ते आज व्हिलचेअरवर बसून कसबा पोटनिवडणुकीच्या प्रचारासाठी मैदानात उतरले आहेत. त्यांनी कसबा पोटनिवडणुकीसाठी आज प्रचाराला सुरुवात केली आहे.
गिरीश बापट आजारी असल्यामुळे त्यांनी सुरुवातीला आपण प्रचारात सहभागी होणार नाही, असं सांगितलं होतं. पण उपमुख्यमंत्री देवेंद्र फडणवीस आणि भाजप नेते संजय काकडे यांनी काल गिरीश बापट यांची भेट घेतली होती. त्यानंतर बापट यांनी आपण प्रचारात सहभागी होणार असल्याचं स्पष्ट केलं होतं. विशेष म्हणजे त्यानंतर आज ते प्रचारात सहभागी देखील झाले.
कसब्यात नगरसेवक, पदाधिकारी आणि कार्यकर्त्यांच्या मेळाव्यात गिरीश बापट यांनी व्हिलचेअरवर एन्ट्री मारली. यावेळी गिरीश बापट यांची प्रकृती प्रचंड ढासळलेली दिसली. त्यांच्या बोटांमध्ये ऑक्सीमीटर होतं. तसेच ऑक्सिजनचा सिलेंडरदेखील होता.
देवेंद्र फडणवीस यांनी काल गिरीश बापट यांची भेट घेतली तेव्हा त्यांनी त्यांच्या तब्येतीची विचारपूस केली होती. फडणवीसांनी बापट यांना तब्येतीची काळजी घेण्यास सांगितलं होतं. दुसरीकडे बापट यांनी आपण कसब्याच्या पोटनिवडणुकीतील भाजपचे उमेदवार हेमंत रासणे यांचा प्रचार करणार असल्याचं म्हटलं होतं.
गिरीश बापट याआधी कसबा विधानसभा जागेवर आमदार होत्या. नंतर ते खासदार म्हणून निवडून आले. त्यानंतर मुक्ता टिळक यांना या जागेसाठी संधी देण्यात आलं होतं. पण मुक्ता यांचं आजारपणामुळे निधन झालं. त्यामुळे ही जागा रिक्त झालीय.
पुण्यात प्रतिष्ठेची लढाई
पुण्यात कसबा आणि चिंचवडच्या पोटनिवडणुकीची लढाई आता प्रतिष्ठेची बनली आहे. महाविकास आघाडीकडून कसब्याच्या जागेवर काँग्रेस उमेदवाराला पाठिंबा देण्यात आलाय. तर भाजपकडून हेमंत रासणे यांना उमेदवारी देण्यात आलीय. या निवडणुकीत मुक्ता टिळक यांच्या कुटुंबातील सदस्यांना उमेदवारी देण्यात यावी, अशी टिळक कुटुंबियांची इच्छा होती. त्यामुळे कसब्यातील राजकीय घडामोडी चर्चेत आल्या होत्या.
दुसरीकडे चिंचवडच्या जागेसाठी महाविकास आघाडीकडून राष्ट्रवादी काँग्रेसचे नाना काटे यांना उमेदवारी देण्यात आलीय. भाजपने दिवंगत आमदार लक्ष्मण जगताप यांच्या पत्नी अश्विनी जगताप यांना उमेदवारी दिलीय. पण या जागेत मोठा ट्विस्ट बघायला मिळतोय. कारण ठाकरे गटाचे नेते राहुल कलाटे यांनी इथे बंडखोरी केलीय. विशेष म्हणजे कलाटे यांना वंचित बहुजन आघाडीला पाठिंबा दिलाय. त्यामुळे या जागेसाठीचा ट्विस्ट जास्त वाढलाय.
