गर्भलिंग चाचणीनंतर गर्भपात… बड्या रॅकेटचा भांडाफोड, पुण्यातून धक्कादायक प्रकार समोर

पुणे जिल्ह्यातील दौंड तालुक्यातील केडगावमध्ये गर्भलिंग निदानाचा धक्कादायक प्रकार समोर आला होता. एका बोगस डॉक्टरकडून पोर्टेबल सोनोग्राफी मशीनच्या माध्यमातून घरामध्ये गुप्तपणे गर्भलिंग तपासणी केली जात असल्याची माहिती समोर आली होती. गर्भलिंग तपासणीसाठी संबंधितांकडून 35 ते 50 हजार रुपये आकारले जात होते. या प्रकरणी बोगस डॉक्टर अण्णासाहेब गिरी याच्याविरोधात यवत पोलीस ठाण्यात गुन्हा दाखल करण्यात आला आहे. या प्रकरणाचा तपास केला असता यात अनेकांचा सहभाग असल्याचे समोर आले आहे.

सात ते आठ डॉक्टर आरोपीच्या संपर्कात

वैद्यकीय अधिकारी डॉ. सचिन गुजर यांनी या प्रकरणी तक्रार दिली होती. याबाबत बोलताना गुजर यांनी म्हटले होते की, गर्भलिंग निदान करण्याचा व्हिडिओ व्हायरल झाला होता. व्हिडिओच्या आधारे यवत पोलीस स्टेशन एफआयआर दाखल केला होता. या एफआयआरच्या आधारे यवत पोलीस स्टेशनने दोन आरोपींना अटक केली आहे. या अटकेनंतर लक्षात आले की गर्भलिंग निदानाचे जाळे दौंड तालुक्यात पसरलेला आहे. या प्रकरणात सात ते आठ डॉक्टर संबंधित आरोपीच्या संपर्कात असल्याचे समोर आले आहे.

घरी जाऊन सोनोग्राफी करायचा

पुढे बोलताना गुजर यांनी सांगितले की, आमच्याकडे 30 सोनोग्राफी सेंटर रजिस्टर आहेत. सिस्टीमच्या बाहेर राहून हा संबंधित व्यक्ती काळे कारणामे करायचा. त्यामुळे त्याची अधिकृत माहिती आमच्याकडे नाही. संबंधित व्यक्ती एजंटला हाताशी धरून तो डायरेक्ट त्या महिलेच्या घरी जायचा आणि सोनोग्राफी करायचा. तो सिस्टीम मध्ये कुठेच राहिला नाही. तो व्हिडिओ आमच्या हाती आला आणि आम्ही एफआयआर दाखल केली. दौंड आणि दौंड तालुक्यातील नागरिकांना नम्र विनंती आहे या गुन्ह्याच्या संदर्भात आपल्या कडे काही माहिती असल्यास पोलीस स्टेशन किंवा दौंड उपजिल्हा रुग्णालय इथे संपर्क साधून ती माहिती द्यावी.

मुख्य आरोपीला अटक

या प्रकरणावर बोलताना यवत पोलीस स्टेशनचे पोलीस निरीक्षक नारायण देशमुख यांनी सांगितले की, मागील काही दिवसांपूर्वी केडगाव येथे गर्भलिंग निदान होत असलेला व्हिडिओ वायरल झाला. दौंड येथील वैद्यकीय अधिकारी डॉक्टर सचिन गुजर यांनी तक्रार दिली, त्यानंतर गुन्हा दाखल धाला. यामध्ये अण्णासाहेब गिरी हा व्यक्ती गर्भलिंग निदान पोर्टेबल मशीन द्वारे करत असलेला तपासात निष्पन्न झाला आहे त्याला अटक करण्यात आली आहे. या तपासामध्ये त्याने ही मशीन नरेंद्र ठाकरे इसमाने कडून खरेदी केल्याचे निष्पन्न झाले आहे.

500 महिलांचा गर्भपात

ही मशीन जप्त करण्यात आली आहे. गर्भलिंग निदान केल्यानंतर तो संबंधित डॉक्टरांकडे त्या महिलेला पाठवून गर्भपात करून घेत होता. या अनुषंगाने तपासामध्ये डॉ अतुल जाधवचा रोल तपासात निष्पन्न झाला आहे. त्यालाही अटक करण्यात आली आहे. आणखी दोन डॉक्टर दोषी असल्याचे तपासात निष्पन्न झाले आहे ते फरार आहेत. दोन वर्षात 500 गर्भपात झाले असं काही रेकॉर्डमध्ये आहे. याचा तपास सुरू आहे. अण्णासाहेब गिरी हा कुठलीही वैद्यकीय पदवी न घेतलेला बोगस डॉक्टर आहे. तो गर्भलिंग निदान करायचा. त्याच्याकडे रुग्ण हे संपर्कातून यायचे. मुलीचा गर्भ निष्पन्न करून ते गर्भपात करायचे. संबंधित महिला आणि तिचे नातेवाईक ही माहिती गुप्त ठेवायचे त्यामुळे तपासात मोठं आव्हान आहे.