अख्खा महाराष्ट्र भिकारी होईल, पण तानाजी सावंत कधीच…; रोहित पवार असं का बोलले?

रणजीत जाधव, टीव्ही9 मराठी प्रतिनिधी, पुणे | 8 ऑक्टोबर 2023 : राष्ट्रवादीचे आमदार रोहित पवार यांनी राज्याचे आरोग्य मंत्री तानाजी सावंत यांच्यावर जोरदार टीका केली आहे. अख्खा महाराष्ट्र भिकारी होईल, पण सावंत कधीच भिकारी होणार नाहीत. अगदी असंच सध्या सुरू आहे. म्हणून तर ते स्वतःचाच विचार करत आहेत. रुग्ण मृतांबाबत मला काहीच विचारू नका असं आरोग्य मंत्री म्हणत आहेत. मग जबाबदारी कुणाची? असा सवाल रोहित पवार यांनी केला आहे. ते मीडियाशी संवाद साधत होते.

अजित पवार यांना मुख्यमंत्री करू असं विधान उपमुख्यमंत्री देवेंद्र फडणवीस यांनी केलं आहे. त्यावरही रोहित पवार यांनी प्रतिक्रिया व्यक्त केली. पुन्हा कधी तरी मुख्यमंत्री करू असंच ते म्हणणार. आत्ताच मुख्यमंत्री करू, आत्ताच न्याय मिळवून देऊ, आत्ताच मृत रुग्णांना मदत करू, असं ते म्हणणार नाहीत. नेहमीच पुन्हा करू असं त्यांचं म्हणणं असतं. यापूर्वीही त्यांनी पुन्हा या शब्दावर जोर दिला होता, असा टोला रोहित पवार यांनी फडणवीस यांनी लगावला आहे.

भुजबळांनी विसरू नये

तुम्ही राष्ट्रीय अध्यक्ष आहात. तर मीही राष्ट्रवादीचा संस्थापक प्रांताध्यक्ष होतो, असं छगन भुजबळ यांनी म्हटलं होतं. भुजबळ यांच्या टीकेचा रोहित पवार यांनी समाचार घेतला. आज भुजबळ काहीही बोलतील, पण त्यांनी हे विसरू नये, त्यांनाच पवार साहेबांनी अनेक मंत्री पदं दिलेली आहेत, असं रोहित पवार म्हणाले.

आता आत्मक्लेशाची गरज नाही

अजितदादांच्या सभेत आता शरद पवार यांच्या ऐवजी यशवंतराव चव्हाण यांचे फोटो लावण्यात आले आहेत. त्यावरही त्यांनी प्रतिक्रिया व्यक्त केली. अजितदादांच्या सभेत यशवंत चव्हाण साहेबांचे फोटो दिसत आहेत. त्याच चव्हाण साहेबांना पवार साहेबानी गुरू मानलं. त्यांच्या प्रेरणेने पवार साहेब राजकारण करतात. आता पवार साहेबांचा फोटो वापरता येईना म्हणून चव्हाण साहेबांचा फोटो वापरला जात आहे. आता चुकीच्या पद्धतीने काम केलं तर कराडच्या समाधीस्थळी जाऊन आत्मक्लेश करण्याची गरज नाही. यशवंतराव चव्हाण साहेबांच्या फोटो समोर बसून केलं तरी चालेल, असा चिमटा त्यांनी काढला.

ते अशोभनीय

ट्रोल करणं हे त्यांचं काम आहे. आज हे लोक वडिलांनाच घरातून बाहेर काढू लागलेत. आजवर पवार साहेबांनी अनेकांना मंत्री पद दिली. अधिकारही दिले. त्यांच्या अधिकारात हस्तक्षेप केला नाही. पण आज ते विरोधी गटात गेले अन् पवार साहेब आमचं चालून देत नव्हते, असं म्हणत आहेत. पवार साहेब हे हुकूमशाही पद्धतीने काम करतात असं म्हणतात, हे अशोभनीय आहे, असंही ते म्हणाले.