‘महिला आयोगावर कचकड्या भावल्या बसवल्यामुळं…’ पुण्यातील ‘त्या’ प्रकरणावरून अंधारेंचा चाकणकरांना टोला

पुण्यामध्ये एका कंपनीत काम करणाऱ्या तरुणीवर तरुणाकडून हल्ला करण्यात आला होता. या हल्ल्यात गंभीर जखमी झालेल्या तरुणीचा मृत्यू झाला. विशेष म्हणजे या तरुणीच्या कंपनीत काम करणाऱ्या तरुणाकडूनच या तरुणीवर हल्ला करण्यात आला. आता या प्रकरणावरून शिवसेना ठाकरे गटाच्या नेत्या सुषमा अंधारे यांनी थेट महिला आयोगाच्या अध्यक्षा रुपाली चाकणकर यांना टोला लगावला आहे, त्यांनी रुपाली चाकणकर यांचं नाव न घेता त्यांच्यावर टीका केली. वारंवार कामाच्या ठिकाणी महिलांच्या सुरक्षेचा प्रश्न निर्माण होतोय. या सगळ्या वरून राज्यातील कायदा सुव्यवस्थेवर प्रश्न निर्माण होत आहे, असं अंधारे यांनी म्हटलं आहे.

नेमकं काय म्हणाल्या सुषमा अंधारे? 

त्यांच्याकडून फार गांभीर्याने काही गोष्टी केल्या जातील ही अपेक्षा व्यर्थ आहे. पुण्यामध्ये ज्या पद्धतीने तरुणीची हत्या करण्यात आली, त्यामुळे वारंवार कामाच्या ठिकाणी महिलांच्या सुरक्षेचा प्रश्न निर्माण होत आहे.  या सगळ्या वरून राज्यातील कायदा सुव्यवस्थेवर प्रश्न निर्माण होत आहे. राज्यात कायदा आणि सुव्यवस्था नावाची गोष्ट आहे का? असा सवाल सुषमा अंधारे यांनी उपस्थित केला आहे. महिला आयोगावर कचकड्याच्या भावल्या बसवल्यामुळे त्यांच्याकडून फार गांभीर्याने काही गोष्टी केल्या जातील ही अपेक्षा व्यर्थ आहे, असा टोलाही यावेळी बोलताना त्यांनी नाव न घेता रुपाली चाकणकर यांना लगावला आहे. यावरून आता राजकारण तापण्याची शक्यता आहे.

 नेमकं काय आहे प्रकरण? 

पुण्यामध्ये बुधवारी एका तरुणीची हत्या करण्यात आली आहे, तिच्याच कंपनीत काम करणाऱ्या एका तरुणानं तीची हत्या केली.  शुभदा कोदारे  असं या तरुणीच नाव आहे. तर कृष्णा कनोजा असं या आरोपी तरुणाचं नाव आहे. वडील आजारी असल्याचं खोट सांगून या तरुणीने या तरुणाकडून पैसे घेतले होते. मात्र तिचे वडील आजारी नसल्याचं जेव्हा या तरुणाला कळलं तेव्हा त्याने या तरुणीकडे पैसे वापस देण्याचा तगादा लावला. यातूनच हे हत्याकांड झाल्याची माहिती समोर आली आहे.