अस्थीविसर्जनाहून परतताना काळाचा घाला, यवतमाळमध्ये अपघातात सात जणांचा मृत्यू

यवतमाळ : यवतमाळच्या जोडमाहो येथे टाटा मॅजिक वाहन झाडावर आदळल्याने भीषण अपघात झाला (Yavatmal accident) आहे. या अपघातात 7 जणांचा मृत्यू झाला असून 5 जण गंभीर जखमी असल्याची माहिती मिळत आहे. जोडमाहोजवळील कळंब पोलीस ठाण्याअंतर्गत वाढोणा खुर्द येथे हा अपघात (Yavatmal accident) घडला.

जोडमोहा येथील मृत बाबाराव वानखडे यांचे दुःखद निधन झाले होते. त्यामुळे त्यांचे सर्व नातेवाईक कोटेश्वर देवस्थान येथील नदीपात्रात अस्थी विसर्जनासाठी गेले होते. दरम्यान अस्थी विसर्जनाचा कार्यक्रम आटपून ते जोडमोहाकडे मॅक्झिमो वाहनाने परतत होते. याचदरम्यान सांयकाळी 5.30 वाजताच्या सूमारास जोडमोहा मार्गावर चालकाचे वाहनावरील नियंत्रण सुटल्याने वाहन झाडाला धडकून थेट दरीत कोसळले.

या वाहनात एकूण 18 महिला आणि पुरुष प्रवासी होते. यामध्ये 7 जणांचा जागीच मृत्यू झाला तर वाहनातील सात ते आठ जण गंभीर जखमी असून अत्यावस्थ असल्याचे सांगण्यात येत आहे. घटनेंनंतर परिसरातील नागरीकांनी बचाव कार्यासाठी सूरूवात केली. या घटनेची माहिती मिळताच कळंबचे ठाणेदार विजय राठोड, यवतमाळ ग्रामीणचे ठाणेदार संजय शिरभाते, जिल्हा वाहतूक शाखेचे साहाय्यक पोलीस निरीक्षक अनिल राऊत, पोलीस कर्मचा-यांनी घटनास्थळ गाठले. यावेळी गावकरी व नातेवाईकांनीही घटनास्थळ गाठून मदत कार्य केले. या घटनेने वानखेडे कुटुंबासह जोडमोहा गावात शोककळा पसरली आहे.

या अपघातातील जखमींना तातडीने जवळच्या वसंतराव नाईक शासकीय रुग्णालयात दाखल करण्यात आले आहे. जखमींवर उपचार सुरु आहेत. यामध्ये मृतांचा आकडा वाढण्याची भीती वर्तवली जात आहे.

अपघातात मृत झालेल्यांची नावं

महादेव बावनकर (53) रा. शेंदुर्जना घाट, किसन कळसकर (55) रा. जोडमोहा, महादेव चंदनकर (58), गणेश चिंचोळकर (52) रा. महागाव, कृष्णा प्रसन्नकर (55), अंजना वानखेडे (69) सर्व रा. जोडमोहा, वाहन चालक अमर आत्राम (32) अशी अपघातात मृत झालेल्यांची नाव आहेत.