जितेंद्र आव्हाडांनी बंद पाडलेला शो मनसेकडून सुरु, ठाण्यात ‘हर हर महादेव’ चित्रपटावरुन प्रचंड संघर्ष

ठाणे : ‘हर हर महादेव’ चित्रपटावरुन ठाण्यात प्रचंड राजकीय संघर्ष बघायला मिळतोय. विशेष म्हणजे राष्ट्रवादी काँग्रेसचे आमदार जितेंद्र आव्हाड हे ठाण्याच्या विवियाना मॉलमध्ये गेले. या मॉलमधील चित्रपटगृहात प्रवेश करुन त्यांनी हर हर महादेव चित्रपटाचा शो बंद पाडला. त्यांनी सर्व प्रेक्षकांना थिएटरच्या बाहेर काढलं. यावेळी एका प्रेक्षकासोबत हाणामारी झाल्याचं देखील कॅमेऱ्यात कैद झालंय. जितेंद्र आव्हाड शो बंद पाडून मॉलमधून बाहेर पडल्यानंतर तिथे मनसे नेते अविनाथ जाधव कार्यकर्त्यांसह थिएटरमध्ये दाखल झाले. त्यांनी बंद पाडलेला चित्रपटाचा शो पुन्हा सुरु केला. यावेळी त्यांनी प्रसारमाध्यमांना प्रतिक्रिया दिली.

“जितेंद्र आव्हाड काही सेन्सॉर बोर्ड नाही. लोकांनी घाबरायची गरज नाही. मनसे तुमच्यासोबत आहे. संस्कृकतीची वार्ता करणाऱ्यांनी अशाप्रकारे येऊन प्रेक्षकांना मारणं ही कोणती संस्कृती आहे? हे आम्हाला पटवून सांगा”, असं अविनाश जाधव म्हणाले.

“मागच्यावेळी तुम्ही तुमच्या बंगल्यात घेऊन जाऊन एकाला मारलं होतं तेच आज इथे येऊन केलं. नक्की तुम्ही बदलत नाही आहात. तुम्ही लोकांना गृहीत धरत आहात”, असा टोला त्यांनी आव्हाडांना लगावला.

“हा चित्रपट सुरु होऊन नऊ-दहा दिवस झाले. काहीतरी स्टंट मारु नका. महाराष्ट्राचे प्रेक्षक तुम्हाला माफ करणार नाही. राज ठाकरे प्रेक्षकांच्या पाठीमागे खंबीरपणे उभे आहेत”, असंदेखील ते म्हणाले.