Sahar Shaikh : ‘कैसा हराया’ बोलून रातोरात प्रसिद्ध झालेली मुंब्र्याची नगरसेविका सहर शेखवर मोठा आरोप, तिने समोर येऊन दिलं स्पष्टीकरण

‘कैसे हराया…’, ‘सगळा मुंब्रा हिरवा करणार’ अशा वक्तव्यांमुळे रातोरात चर्चेत आलेली AIMIM ची युवा नेता सहर शेख आता एका नव्या वादात सापडली आहे. ठाणे महानगर पालिकेच्या वॉर्ड नंबर 30 मधून सहर शेखने नगरसेवक पदाची निवडणूक जिंकली होती. आता सहर शेखवर निवडणुकी दरम्यान खोटी कागदपत्र दाखवल्याचा आरोप झाला आहे. हा वाद वाढत असल्याचं पाहून सहर शेखने आपलं मौन सोडलं आहे. “माझ्यावर लावण्यात आलेले सर्व आरोप आधारहीन असून राजकीय दृष्टया मला बदनाम करण्याचा प्रयत्न केला जात आहे” असं सहर शेखने म्हटलं आहे.

“मागच्या पाच-सहा दिवसांपासून ज्या बातम्या चालवल्या जात आहेत, त्याचा मला खूप त्रास होतोय. मला फरार म्हटलं गेलं, नॉट रिचेबल आहे असं सांगतायत. प्रत्यक्षात मी जमिनीवर काम करत होती. जेव्हा तुम्ही लोकांमध्ये राहून काम करताय आणि त्याचवेळी तुमच्याबद्दल चुकीचं पसरवलं जातं, त्याचा खूप त्रास होतो. सुरुवातीला मी मीडियापासून मुद्दाम लांब राहिली. कारण मला कायदेशीर प्रक्रिया समजून घेऊन त्यानुसारच उत्तर द्यायचं होतं” असं सहर शेखने सांगितलं.

कोर्टात उत्तर द्यावं लागेल

“मी या सगळ्या प्रकरणात कायदेशीर लढाई लढणार आहे. आम्ही संविधानावर विश्वास ठेवणारे लोक आहोत. आमचा न्याय व्यवस्थेवर विश्वास आहे. म्हणून आम्ही कायदेशीर प्रक्रियेला वेळ दिला. आता यापुढे मी प्रत्येक आरोपाला कोर्टात उत्तर देईन. ज्यांनी हे आरोप केलेत, त्यांना कायदेशीर आव्हान देणार. माझ्याविरुद्ध जाणीवपूर्वक चुकीचे फोटो आणि बॅनर दाखवले. हा सर्व राजकीय कारस्थानचा भागा होता” असं तिने म्हटलय. “ज्यांनी माझी प्रतिमा मलिन करण्याचा प्रयत्न केला, त्यांना कायदेशीर नोटीस पाठवली आहे. जे कोणी जबाबदार असतील, त्यांना कोर्टात उत्तर द्यावं लागेल” असं सहर शेख म्हणाल्या आहेत.

तहसीलदारांनी चौकशी केल्यानंतर शिफारस

ठाणे तहसीलदार कार्यालयाने सहर शेख यांचे पिता यूनुस इकबाल शेख यांच्याविरुद्ध कथितरित्या खोट्या जात प्रमाणपत्राचा वापर केल्याचा आणि त्याचं आधारावर आपल्या मुलीसाठी जात प्रमाणपत्र मिळवलं म्हणून गुन्हा दाखल करण्याची शिफारस केली होती. तहसीलदार उमेश पाटील यांनी या प्रकरणात चौकशी केली. त्यानंतरच शिफारस केली. वर्ष 2011 मधील त्यांचं ओबीसी प्रमाणपत्र अधिकृत प्रारुपाप्रमाणे नव्हतं. त्यावर एसडीओची अनिवार्य स्वाक्षरी नव्हती. त्या प्रमाणपत्रावर स्टेट ऑफ महाराष्ट्र सुद्धा लिहिलेलं नव्हतं. शेख यांचे वडिल आणि काका मूळ उत्तर प्रदेश गाजियाबादचे निवासी असल्याचं चौकशीत आढळून आलं.