तुकाराम मुंढे आता होमग्राऊंडवर

तुकाराम मुंढे आता होमग्राऊंडवर

नाशिक : कर्तव्यदक्ष आयएएस अधिकारी तुकाराम मुंढे यांची नाशिक महापालिका आयुक्तपदावरुन बदली करण्यात आली आहे. उस्मानाबादचे जिल्हाधिकारी म्हणून ते आता काम पाहतील. त्यांच्या जागी उस्मानाबादचे जिल्हाधिकारी राधाकृष्ण गमे यांची नाशिक महापालिकेचे नवे आयुक्त म्हणून नियुक्ती करण्यात आली आहे. भाजप नगरसेवकांच्या नाराजीमुळे तुकाराम मुंढेंची बदली केल्याचं बोललं जात आहे.

तुकाराम मुंढेंची नवी इनिंग आता त्यांचं होमग्राऊंड असलेल्या मराठवाड्यातून सुरु होणार आहे. तुकाराम मुंढे यांचं गाव बीड जिल्ह्यात आहे. त्यांचं बरंच शिक्षण मराठवाड्याची राजधानी औरंगाबादमध्ये झालंय. त्यामुळे आपल्या होमग्राऊंडवर त्यांची नवी इनिंग सुर होणार आहे. उस्मानाबादकरांनी तर सोशल मीडियातून आत्ताच तुकाराम मुंढेंचं स्वागत केलंय.

तुकाराम मुंढे यांची कारकीर्द

नागपूर जिल्हा परिषदेवर 2008 साली तुकाराम मुंढे यांची सीईओ म्हणून नियुक्ती झाली. त्याच दिवशी त्यांनी शाळेला भेटी दिल्या आणि गैहजर शिक्षकांचं निलंबन केलं. वैद्यकीय कारभारात अनियमितता दिसल्याने काही डॉक्टरांनाही निलंबित केलं.

सोलापूरचे जिल्हाधिकारी असताना वाळू माफियांविरोधात कारवाईचा बडगा उगारला. त्यांना वाळू माफियांच्या रोषाचाही सामना करावा लागला. पंढरपूर मंदिर समितीच्या चेअरमनपदी नियुक्ती झाल्यानंतर मुख्यमंत्री सोडून इतरांचं व्हीआयपी दर्शन बंद केलं.

नवी मुंबईत महापालिका आयुक्तपदी बदली झाली. नवी मुंबईत आल्यानंतर अनधिकृत बांधकामांवर कारवाई सुरु केली आणि तिथेच तुकाराम मुंढे सत्ताधाऱ्यांच्या निशाण्यावर आले. नवी मुंबईतही त्यांच्याविरोधात अविश्वास ठराव आणण्यात आला.

नवी मुंबईतून पुण्यात पीएमपीएमएल अध्यक्षपदी बदली झाली. पुण्यात गेल्यानंतर त्यांनी तोट्यात असलेल्या पीएमपीएमएलचा महसूल वाढवण्यासाठी अनेक पाऊलं उचलली, नियम बदलले आणि नागरिकांना केंद्रस्थानी ठेवून सुविधा दिल्या. पण पीएमपीएमएल कर्मचाऱ्यांच्या निलंबनामुळे त्यांची कारकीर्द पुन्हा एकदा चर्चेत आली.

पुण्यातून तुकाराम मुंढे यांची बदली नाशिकला करण्यात आली. तिथे ते किमान एक वर्ष पूर्ण करतील, अशी अपेक्षा होती. पण एका वर्षाच्या आतच त्यांची बदली आता उस्मानाबादला करण्यात आलीय. उस्मानाबादकरांनी तुकाराम मुढेंचं स्वागत केलंय. प्रत्येक जण तुकाराम मुंढेंचं आपल्या जिल्ह्यात स्वागत करत असताना राजकारण्यांना त्यांचं एवढं वावडं का? असा प्रश्न उपस्थित केला जातोय.

Published On - 8:33 pm, Wed, 21 November 18

Click on your DTH Provider to Add TV9 MARATHI