कुणाल कामराचे खोचक ट्विट; अर्णब गोस्वामींना पुन्हा डिवचले

मुंबई: गेल्या काही दिवसांपासून शिवसेना खासदार संजय राऊत यांच्या मुलाखतीमुळे चर्चेत असलेला स्टँडअप कॉमेडियन कुणाल कामराने ट्विटरवर एक मिम शेअर केले आहे. यामध्ये संजय राऊत आणि कुणाल कामरा पोलिसाच्या वेषात दिसत असून त्यांनी अर्णब गोस्वामी यांना पकडल्याचे दाखवण्यात आले आहे. काही दिवसांपूर्वीच मुंबई पोलिसांनी टीआरपी घोटाळ्याचा पर्दाफाश केला होता. यामध्ये रिपब्लिक वृत्तवाहिनीचा सहभाग असल्याची माहिती समोर आली होती. सध्या मुंबई पोलिसांकडून टीआरपी स्कॅमचा तपास सुरु आहे. याप्रकरणी अर्णब गोस्वामी यांना चौकशीसाठी बोलावले जाण्याची शक्यता आहे.  (Kunal Kamra shares Meme on Twitter)

या पार्श्वभूमीवर कुणाल कामराने ट्विटरवरून मिम शेअर करत अर्णब गोस्वामी यांना डिवचले आहे. जानेवारी महिन्यात कुणाल कामरा आणि पत्रकार अर्णब गोस्वामी इंडिगो एअरलाईन्सच्या एकाच विमानाने प्रवास करत होते. त्यावेळी कुणाल कामराने अर्णब गोस्वामी यांच्यावर प्रश्नांचा भडिमार केला होता. कुणाल कामरा याने अनेकदा अर्णब गोस्वामीच्या पत्रकारितेच्या हेतूवरच प्रश्न उपस्थित केले होते. अर्णब गोस्वामी याच्यासोबत गैरवर्तन केल्याचा ठपका ठेवत इंडिगो, एअर इंडिया, स्पाईस जेट आणि गो एयर या कंपन्याकंडून कुणाल कामरावर सहा महिन्यांची प्रवासबंदी घालण्यात आली होती.

Now who did this? pic.twitter.com/eoMf74ikef

— Kunal Kamra (@kunalkamra88) October 19, 2020

काही दिवसांपूर्वीच कुणाल कामराने शिवसेना नेते संजय राऊत (Sanjay Raut) राष्ट्रपती होतील, तेव्हा मला महाराष्ट्रात राष्ट्रपती राजवट चालणार आहे, असे तिरकस ट्विट केले होते. ‘शट अप या कुणाल’ पॉडकास्टमध्ये राऊतांची मुलाखत झाल्यापासून कामरा त्यांच्या प्रेमात असल्याचे दिसत आहे. ही मुलाखत लवकरच यूट्यूबवर प्रदर्शित होणार आहे.

काही दिवसांपूर्वीच मुंबईत या मुलाखतीचे चित्रीकरण पार पडले होते. राज्य ते देशाच्या राजकारणातील घडामोडी, मोदी सरकार ते महाविकास आघाडी सरकार, सुशांतसिंह प्रकरण ते कंगनाशी झालेला वाद, राज्यातील कोरोनाची स्थिती, कन्हैया कुमार ते मनसे या मुद्द्यांवर मुलाखत रंगली.

संबंधित बातम्या:

संजय राऊत राष्ट्रपती झाल्यास महाराष्ट्रात राष्ट्रपती राजवट चालेल, कुणाल कामराचे भाजपला

सुप्रिया सुळे कुणाल कामराच्या भेटीला, ‘शट अप या कुणाल’मध्ये मुलाखत रंगणार?

उखाड दिया मुलाखत… ‘शटअप या कुणाल’च्या सेटवर रंगला कामरा-राऊतांचा सामना

(Kunal Kamra shares Meme on Twitter)