नारायण राणेंनी घेतली अमित शाहांची भेट, जनआशीर्वाद यात्रेतील वादावर चर्चा?
जनआशीर्वाद यात्रेदरम्यान मुख्यमंत्री उद्धव ठाकरे यांच्याबाबत केलेल्या आक्षेपार्ह वक्तव्यानंतर महाविकास आघाडी सरकारकडून राणेंना अटक करण्यात आली होती. त्यानंतर त्याच रात्री त्यांची जामीनावर सुटकाही झाली होती. त्यानंतर आज राणे शाहांच्या भेटीला पोहोचले होते.
नवी दिल्ली : भाजप नेते आणि केंद्रीय मंत्री नारायण राणे यांनी आज केंद्रीय गृहमंत्री अमित शाह यांची भेट घेतली. राजधानी दिल्लीमध्ये ही भेट झाली. महाराष्ट्रातील जनआशीर्वाद यात्रे दरम्यान झालेल्या राजकीय नाट्यानंतर नारायण राणे पहिल्यांदाच अमित शाह यांच्या भेटीला पोहोचले. जनआशीर्वाद यात्रेदरम्यान मुख्यमंत्री उद्धव ठाकरे यांच्याबाबत केलेल्या आक्षेपार्ह वक्तव्यानंतर महाविकास आघाडी सरकारकडून राणेंना अटक करण्यात आली होती. त्यानंतर त्याच रात्री त्यांची जामीनावर सुटकाही झाली होती. त्यानंतर आज राणे शाहांच्या भेटीला पोहोचले होते. (Narayan Rane called on Union Home Minister Amit Shah at Delhi)
ऑगस्टमध्ये नवनिर्वाचित केंद्रीय मंत्र्यांनी महाराष्ट्रात जनआशीर्वाद यात्रा काढली होती. त्यात केंद्रीय सुक्ष्म, लघू व मध्यम उद्योग मंत्री नारायण राणे, केंद्रीय आरोग्य राज्यमंत्री डॉ. भारती पवार, केंद्रीय अर्थ राज्यमंत्री डॉ. भागवत कराड, केंद्रीय पंचायतराज राज्यमंत्री कपिल पाटील यांचा समावेश होता. या चौघांपैकी नारायण राणे यांची जनआशीर्वाद यात्रा चांगलीच चर्चेत राहिली. कारण राणे यांनी या यात्रेदरम्यान मुख्यमंत्र्यांबाबत एक वक्तव्य केलं. त्यानंतर राज्याच्या राजकारणात मोठं वादळ उठलं. राज्य सरकारनं राणेंवर अटकेची कारवाईही केली होती. त्या पार्श्वभूमीवर ही भेट होत असल्यामुळे राणे आणि शाह यांच्यात त्या विषयावर चर्चा झाली का? असा प्रश्न आता सर्वांना पडला आहे.
केंद्रीय गृहमंत्री मा. अमित शाह जी यांची आज भेट घेतली. @AmitShah @AmitShahOffice pic.twitter.com/I8EbZjmwK4
— Narayan Rane (@MeNarayanRane) September 22, 2021
‘राणेंची विचारपूस करण्यासाठी अमित शाहांचा फोन’
जनआशीर्वाद यात्रेवेळी राणेंची अटक आणि जामीनानंतर केंद्रातील भाजप नेत्यांनी त्यांची फोनवरुन विचारपूस केली होती. त्यात अमित शाह यांचाही समावेश होता. यावेळी अमित शाह यांनी नारायण राणे यांची विचारपूस केली होती. तसेच पोलीस कारवाई आणि अटकेचा कारवाईबाबतचे तपशीलही अमित शाह यांनी नारायण राणे यांना विचारल्याचे समजते. भाजपचे नेते प्रमोद जठार यांनी ही माहिती दिली होती.
अमित शाहांशी बोला, रामदास आठवलेंचा सल्ला
केंद्रीय सामाजिक न्याय राज्यमंत्री रामदास आठवले यांनी बुधवारी नारायण राणे यांची त्यांच्या जुहू येथील घरी भेट घेतली होती. तसंच आठवले यांनी नारायण राणेंना रिपब्लिकन पक्षाचा जाहीर पाठिंबा दिला आहे. राणेंवर झालेली कारवाई ही अन्यायकारक आणि चुकीची असल्याचा आरोपही आठवले यांनी केला होता.
नारायण राणे हे प्रदीर्घ अनुभव घेतलेले नेते असून त्यांच्यावर झालेली पोलिसी कारवाई अन्यायकारक चुकीची आहे. अशा प्रसंगांना पुरून उरणारे निर्भीड नेते नारायण राणे असून त्यांच्या या प्रसंगात रिपब्लिकन पक्ष नारायण राणे यांच्या पाठीशी असल्याचे सांगत ना रामदास आठवले यांनी नारायण राणे यांना पाठिंबा दिला. नारायण राणे अशा प्रसंगांमुळे डगमणारे नेते नाहीत. ते खंबीर आहेत. निडर अहेत. त्यांनी दिल्लीत येऊन झालेल्या प्रकाराची गृहमंत्री अमित शहांना माहिती द्यावी, असे आठवले यांनी म्हटले होते.
इतर बातम्या :
महिलांवरील अत्याचार रोखण्यासाठी चित्रा वाघ आक्रमक, महाविकास आघाडी सरकारकडे महत्वाची मागणी
Narayan Rane called on Union Home Minister Amit Shah at Delhi
