मंदिराच्या पुजाऱ्याचा दावा खोटा, पीएम मोदींनी दानपेटीत लिफाफा नव्हे तर टाकले होते रोख रुपये

मुंबई : राजस्थानमधील भीलवाडा येथील मालसेरी देवडुंगरी येथील देवनारायण मंदिराच्या दानपेटीत पंतप्रधान नरेंद्र मोदी यांनी २१ रुपये जमा केल्याप्रकरणी नवा खुलासा झाला आहे. TV9 भारतवर्षाने मिळवलेल्या व्हिडीओमध्ये पंतप्रधान मोदींनी दानपेटीत लिफाफे नव्हे तर रोख रक्कम टाकल्याचे दिसून येते. मंदिराच्या पुजाऱ्याने दावा केला होता की पीएम मोदींनी मंदिराच्या दानपेटीत एक लिफाफा टाकला होता आणि त्यात 21 रुपयांची दान रक्कम सापडली होती, ज्यामध्ये 20 रुपयांची नोट आणि एक नाणे होते.

PM मोदींकडून रोख रक्कम दान

TV9 Bharatvarsh वर उपलब्ध असलेल्या व्हिडिओमध्ये पंतप्रधान नरेंद्र मोदी दानपेटीत पैसे टाकत असल्याचे स्पष्टपणे दिसत आहे. पंतप्रधान नरेंद्र मोदी 28 जानेवारी रोजी मालसेरी देवडुंगरी येथील मंदिरात पूजा करण्यासाठी आले होते. मंदिराच्या दानपेटीत पीएम मोदींनी पांढरा लिफाफा ठेवल्याचा दावा मंदिराच्या पुजाऱ्याने केला होता. पंतप्रधान मोदींच्या भेटीनंतर 25 सप्टेंबरला आठ महिन्यांनी मंदिराच्या पुजाऱ्याने दानपेटी उघडली तेव्हा त्यात तीन लिफाफे सापडले. पांढरा लिफाफा पीएम मोदींचा असल्याचा दावा करण्यात आला होता. मंदिराच्या पुजाऱ्याने सर्वांसमोर लिफाफा उघडला, त्यात २१ रुपये सापडले.

पंतप्रधान नरेंद्र मोदी मंदिराच्या दानपेटीत रोख रक्कम टाकत असताना मंदिराचे पुजारी हेमराज पोसवाल त्यांच्या मागे उभे असल्याचे व्हिडिओमध्ये दिसत आहे. पीएम मोदींच्या हातात काही पैसे आहेत आणि ते दानपेटीत टाकताना दिसत आहेत.

भगवान देवनारायण यांचे जन्मस्थान

मालसेरी डुंगरी हे गुर्जर समाजाचे उपासक भगवान देवनारायण यांचे जन्मस्थान मानले जाते. असे मानले जाते की भगवान देवनारायण यांच्या आईने 1111 वर्षांपूर्वी या ठिकाणी तपश्चर्या केली होती, त्यानंतर भगवान विष्णू स्वतः देवनारायणाच्या रूपात प्रकट झाले. त्यामुळेच गुर्जर समाजातील लोकांमध्ये या मंदिराचे विशेष महत्त्व आहे.