3 महिन्यासाठी भारतात आली अन् बनली टॉपची अभिनेत्री, एका रात्रीत बदललं नशीब, आज कुठे आहे ही अभिनेत्री?
90 च्या दशकातील प्रसिद्ध अभिनेत्री जिने सौंदर्य आणि अभिनयामध्ये दिली करिश्मा-रवीनाला टक्कर. 3 महिन्यांसाठी भारतात आली अन् एक रात्रीत बदललं नशीब. बनली टॉपची अभिनेत्री.
चित्रपटसृष्टीत अनेक कलाकार असे असतात ज्यांचा प्रवास नशिबाच्या जोरावर घडलेला असतो. 90 च्या दशकातील लोकप्रिय अभिनेत्री अनु अग्रवालने अलीकडेच तिच्या आयुष्यातील असाच एक अनुभव शेअर केला आहे.
तिने सांगितले की, चित्रपटसृष्टीत येणे हा तिचा ठरवून घेतलेला निर्णय नव्हता तर तो एक योगायोग होता. अनु अग्रवालने इंस्टाग्रामवर एक फोटो शेअर केला, ज्यामध्ये ती आपल्या सहकलाकार राहुल रॉयसोबत दिसत आहे. या पोस्टसोबत तिने तिच्या करिअरच्या सुरुवातीच्या आठवणी आणि आशिकी या चित्रपटाशी संबंधित अनुभव शेअर केला आहे.
अभिनेत्रीने आपल्या पोस्टमध्ये म्हटले की, मी चित्रपटांमध्ये जशी एंट्री केली, तशी ती पूर्वनियोजित नव्हती. मागे वळून पाहते तेव्हा वाटते की, फिल्म इंडस्ट्रीत येण्याचा माझा कोणताही प्लॅन नव्हता. त्या काळात मी भारतातील काम पूर्ण करून पॅरिस येथे परत जाण्याच्या तयारीत होते.
मी मॉडेलिंग करत होते आणि त्यातच पुढे जाण्याची इच्छा होती. पण त्याच दरम्यान अचानक मला ‘आशिकी’ चित्रपटाची ऑफर मिळाली आणि माझ्या आयुष्याला नवा वळण मिळाले. मी सुरुवातीला या चित्रपटासाठी केवळ एका छोट्या शेड्यूलसाठी होकार दिला होता. काही महिने शूटिंग करून पुन्हा माझ्या जुन्या कामाकडे परतण्याचा माझा विचार होता. माझा प्लॅन फक्त तीन महिन्यांचा होता, पण नशिबाने काही वेगळेच ठरवले होते' असं ती म्हणाली.
1990 साली प्रदर्शित झालेल्या ‘आशिकी’ चित्रपटाने अनु अग्रवाल रातोरात प्रसिद्धीच्या शिखरावर पोहोचवली. हा चित्रपट त्या काळातील सुपरहिट चित्रपटांपैकी एक ठरला. विशेष म्हणजे, या चित्रपटातील गाणी आजही प्रेक्षकांच्या मनात घर करून आहेत.
