बॉलिवूडच्या या 4 गाण्यांवरून झालेला प्रचंड गदारोळ, शेवटचं तर प्रचंड वादग्रस्त, पण आजही आहे सुपरहिट
बॉलिवूडमधील चार वादग्रस्त गाणी, ज्यांच्या शब्दावरून झालेला मोठा वाद. काहींनी शब्द बदलले तर काहींनी शब्द म्यूट केले. पण आजही ही गाणी आहेत प्रचंड सुपरहिट.
बॉलिवूडमध्ये चित्रपटांइतकीच गाण्यांचीही लोकप्रियता असते. मात्र, काही वेळा गाण्यांचे बोल, त्यातील शब्दप्रयोग किंवा दुहेरी अर्थ निघू शकणाऱ्या ओळींमुळे निर्मात्यांना मोठ्या वादांचा सामना करावा लागला आहे. चला तर मग जाणून घेऊयात अशाच काही गाजलेल्या आणि वादग्रस्त बॉलिवूड गाण्यांविषयी.
2012 मध्ये प्रदर्शित झालेल्या Student of the Year या चित्रपटातील ‘राधा लाइक्स टू पार्टी’ हे गाणे प्रचंड लोकप्रिय झाले होते. या गाण्याच्या मूळ बोलांमध्ये ‘सेक्सी राधा’ असा उल्लेख करण्यात आला होता. मात्र, धार्मिक संघटनांनी ‘राधा’ या नावासोबत ‘सेक्सी’ हा शब्द वापरण्यावर तीव्र आक्षेप घेतला. वाढत्या विरोधानंतर निर्मात्यांनी गाण्यातील ‘सेक्सी’ हा शब्द बदलून ‘देसी’ केला.
सामान्य वाटणारा ‘आंटी’ हा शब्दही दोन वेगवेगळ्या गाण्यांमुळे वादाच्या केंद्रस्थानी आला होता. ‘बोल ना आंटी आऊं क्या’ या लोकप्रिय गाण्यात ‘आंटी’ शब्दाचा वापर ज्या पद्धतीने करण्यात आला होता, त्यावर अनेकांनी टीका केली होती. त्याचप्रमाणे Yo Yo Honey Singh च्या ‘पार्टी ऑल नाईट’ या गाण्यातील ‘आंटी’ शब्दावरही आक्षेप घेण्यात आला होता. वाद वाढल्यानंतर या गाण्यातील तो शब्द म्यूट करण्यात आला.
'कमीने' या चित्रपटातील ‘आजा-आजा दिल निचोड़े’ हे गाणे आजही लोकप्रिय आहे. मात्र, गाण्यातील ‘तेली का तेल निकाले’ या ओळीवरून मोठा वाद झाला होता.‘तेली समाजा’तील काही संघटनांनी या शब्दप्रयोगावर नाराजी व्यक्त केली आणि तो आक्षेपार्ह असल्याचे सांगितले. त्यानंतर सेन्सॉर बोर्डाने संबंधित शब्द म्यूट करण्याचे निर्देश दिले.
'शूटआउट ॲट वडाळा' या चित्रपटातील सनी लिओनीवर चित्रित करण्यात आलेले ‘लैला तेरी लूट लेगी’ हे गाणेही वादातून सुटले नव्हते. गाण्याचे मूळ बोल ‘लैला तेरी ले लेगी, तू लिख के ले ले’ असे होते. मात्र, या ओळींना दुहेरी अर्थ असल्याचे मानून सेन्सॉर बोर्डाने त्यावर आक्षेप घेतला. त्यानंतर गाण्याचे बोल बदलण्यात आले आणि ‘ले लेगी’ ऐवजी ‘लूट लेगी’ असा शब्दप्रयोग करण्यात आला.
