7 फूट की 9 फूट, थंड हवेसाठी पंखा नक्की किती उंचीवर असावा? जाणून घ्या योग्य गणित
उन्हाळ्यात पंख्याची थंड हवा मिळवण्यासाठी तो योग्य उंचीवर आणि योग्य अंतरावर बसवणे गरजेचे आहे. पंख्याची उंची, पात्यांचा आकार आणि भिंतीपासूनचे अंतर याबद्दलच्या टिप्स या लेखात वाचा.
उन्हाळ्याच्या दिवसात पंख्याशिवाय एक क्षणही बसणे कठीण होते. अनेकदा आपण महागडे आणि हाय-स्पीड पंखे विकत घेतो, परंतु तरीही खोलीत म्हणावी तशी हवा लागत नाही. जर तुमच्या बाबतीतही असे घडत असेल, तर पंख्यामध्ये दोष नसून तो बसवण्याच्या पद्धतीत चूक असू शकते.
पंखा बसवताना जमिनीपासूनची उंची आणि भिंतीपासूनचे अंतर या तांत्रिक गोष्टींकडे दुर्लक्ष केल्यास हवेचा प्रवाह विस्कळीत होऊ शकतो. पंखा बसवताना त्याची जमिनीपासूनची उंची अत्यंत महत्त्वाची आहे.
जर पंखा खूप खाली असेल तर तो सुरक्षिततेच्या दृष्टीने धोकादायक ठरू शकतो. याउलट, तो खूप उंचावर असेल तर हवेचा प्रवाह जमिनीपर्यंत नीट पोहोचत नाही.
सुरक्षिततेसाठी पंखा जमिनीपासून किमान ७ फूट उंचीवर असणे आवश्यक आहे. जर खोलीची उंची पुरेशी असेल, तर पंखा ८ ते ९ फूट उंचीवर लावणे सर्वात उत्तम ठरते. यामुळे हवा संपूर्ण खोलीत योग्य प्रकारे पसरते.
पंख्याची पाती आणि छत यामध्ये किमान १० इंचांचे अंतर असावे. जर हे अंतर नसेल, तर पंख्याला वरून हवा ओढता येत नाही आणि परिणामी खाली हवा लागत नाही. पंखा खोलीच्या मध्यभागी असावा, पण तो भिंतीच्या खूप जवळ नसावा.
पंखा आणि जवळची भिंत यामध्ये किमान २ फूट अंतर राखणे गरजेचे आहे. भिंतीजवळ पंखा असल्यास हवेत अडथळा येतो. केवळ उंचीच नाही, तर खोलीच्या आकारानुसार योग्य पंखा निवडणे आवश्यक आहे.
जर ७५ चौ. फूट: २९ ते ३६ इंच पंखा, ७६ ते १४४ चौ. फूट: ३६ ते ४२ इंच पंखा, १४४ ते २२५ चौ. फूट: ४४ इंच पंखा, २२५ ते ४०० चौ. फूट: ५० ते ५४ इंच पंखा असावा.
ज्या घरांची छते १० फुटांपेक्षा जास्त उंच आहेत, तिथे हवा लागण्यासाठी डाउनरॉड (Downrod) वापरणे फायदेशीर ठरते. जर ११ फूट उंच छत असेल आणि तुम्हाला ९ फुटांवर पंखा हवा असेल, तर २ फुटांचा डाउनरॉड वापरून तुम्ही हवेचा प्रवाह सुधारू शकता.
