कोणाच्या डोक्यातून ही घाणेरडी कल्पना..; ‘धुरंधर 2’साठी जियो हॉटस्टारला निवडणं पडलं महागात?
Dhurandhar 2 : जियो हॉटस्टार या ओटीटी प्लॅटफॉर्मवर रणवीर सिंहचा बहुचर्चित आणि बहुप्रतिक्षित 'धुरंधर 2' हा चित्रपट थेट स्ट्रीम करण्याऐवजी त्याचं लाइव्ह स्ट्रीमिंग करण्यात आलं होतं. यामुळे प्रेक्षक नाराज झाले आहेत.
2025 मध्ये प्रदर्शित झालेला 'धुरंधर' हा पहिला भाग निर्मात्यांनी नेटफ्लिक्स या ओटीटी प्लॅटफॉर्मवर स्ट्रीम केला होता. त्यानंतर मार्च 2026 मध्ये प्रेक्षकांच्या भेटीला आलेल्या 'धुरंधर : द रिव्हेंज' या चित्रपटासाठी मात्र त्यांनी नेटफिल्क्सच्या ऐवजी जियो हॉटस्टारची निवड केली. मात्र ही निवड आता निर्मात्यांना खूप महागात पडल्याचं दिसत आहे. 4 जून रोजी या प्लॅटफॉर्मवर 'धुरंधर 2'चा ग्रँड प्रीमिअर होता.
'धुरंधर 2' ओटीटीवर येण्याची प्रेक्षक आतुरतेने वाट पाहत होते. त्यामुळे प्रीमिअरच्या दिवशीच अनेकांनी हा चित्रपट सलग एका टप्प्यात ओटीटीवर पाहण्याचा प्लॅन केला होता. मात्र ऐनवेळी प्रेक्षकांची मोठी निराशा झाली. कारण जियो हॉटस्टारने थेट हा चित्रपट स्ट्रीम न करता त्याचं लाइव्ह स्ट्रीमिंग केलं होतं. यावरून प्रेक्षकांनी सोशल मीडियावर तीव्र संताप व्यक्त केला.
ओटीटी प्लॅटफॉर्म हे लाइव्ह स्ट्रीमिंगसाठी नाही ठेवलंय, असं मत अनेकांनी मांडलं आहे. 'तुम्ही आरामात कोणत्याही ड्रामाशिवाय थेट चित्रपटासारखा प्रदर्शित करू शकले असते. यासाठी लाइव्ह स्ट्रिमिंगची काहीच गरज नव्हती', असं एकाने लिहिलं. तर 'जियो हॉटस्टारने कोणत्या नशेत 'धुरंधर 2'च्या लाइव्ह स्ट्रिमिंगला चांगला पर्याय समजून घेतलंय? स्ट्रीमिंगनंतरही हा चित्रपट दिसत नाहीये, काय फालतूगिरी आहे ही', अशा शब्दांत नेटकऱ्यांनी राग व्यक्त केला.
'धुरंधर 2 सारख्या चित्रपटाचं लाइव्ह स्ट्रिमिंग करण्याइतकी लाजिरवाणी ओटीटी साइट दुसरी कोणतीही नाही', असं तिसऱ्याने लिहिलं. तर 'जियो हॉटस्टारवर धुरंधर 2 पाहणं हा अत्यंत निराशाजनक अनुभव होता. जर आम्ही पॉज करून पुन्हा सुरू केलं तर ते जिथे पॉज केलं होतं तिथून पुढे सुरू होत नाही. ही मोठी डोकेदुखी आहे', असं आणख एका युजरने म्हटलंय.
'धुरंधर : द रिव्हेंज' या चित्रपटाने जगभरात 1300 कोटी रुपयांहून अधिक गल्ला जमवला आहे. यामध्ये रणवीर सिंह, अर्जुन रामपाल, आर. माधवन, संजय दत्त, राकेश बेदी, सारा अर्जुन यांच्या भूमिका आहेत. याआधी अभिनेत्री बंदगी कालरानेही ओटीटी रिलिजच्या नव्या स्ट्रॅटेजीवर तीव्र नाराजी व्यक्त केली होती.
