चला सोनं घ्यायला! एकाच दिवसात भाव चांगलाच घसरला; 10 ग्रॅमसाठी किती पैसे मोजावे लागणार?
इराण युद्धामुळे सोन्याचा भाव कधी वाढतोय तर कधी कमी होताना दिसतोय. आज पुन्हा एकदा सोन्याचा भाव घसरला आहे. आता सोन्यासाठी तुम्हाला कमी पैसे द्यावे लागणार आहेत.
अमेरिका आणि इराण यांच्यातील युद्धामुळे जागतिक पातळीवरील अस्थिरता अजूनही संपलेली नाही. शेअर बाजारासह भारतातील सराफा बाजारावरही या अस्थिरतेचा परिणाम होत आहे. आज सोने आणि चांदीचा भाव चांगलाच पडला आहे.
मिळालेल्या माहितीनुसार जळगावच्या सराफा बाजारात सोने आणि चांदीच्या दरात घसरण झाली आहे. आज सोन्याच्या दरात प्रति 10 ग्रॅममागे पाचशे रुपयांची तर चांदीच्या दरात प्रती किलोमागे तीन हजार रुपयांची घसरण झालेली पाहायला मिळाली.
सुवर्णनगरी म्हणून ओळखल्या जाणाऱ्या जळगावात सोन्याचा दर आता जीएसटी सह 1 लाख 59 हजार 135 रुपये प्रति 10 ग्रॅम रुपयांपर्यंत घसरला आहे. तर चांदीचा दर जीएसटीसह 2 लाख 72 हजार 950 रुपये प्रति एक किलोपर्यंत खाली आला आहे.
गेल्या पंधरा दिवसांपासून सोन्या चांदीच्या दरात चढ-उतार सुरू असल्याने आता ग्राहकांमध्ये संभ्रम निर्माण झाला आहे. सोन्याचा भाव भविष्यातही अशाच पद्धतीने कमी होणार का? असे विचारले जात आहे.
(टीप- वरच्या लेखात दिलेली माहिती ही प्राथमिक स्वरुपाची आहे. या लेखाच्या माध्यमातून गुंतवणूक करण्याचा सल्ला दिलेला नाही. कुठेही प्रत्यक्ष वा अप्रत्यक्ष गुंतवणूक करायची असेल किंवा कोणताही आर्थिक निर्णय घ्यायचा असेल तर त्या-त्या क्षेत्रातील तज्ज्ञांचा सल्ला जरूर घ्या)
