फ्रीमध्ये घरबसल्या पाहता येणार ‘राजा शिवाजी’ चित्रपट, रितेश देशमुखने जाहीर केली तारिख
मराठी इंडस्ट्रीमधील 2026 चा सर्वात मोठा ब्लॉकबस्टर चित्रपट 'राजा शिवाजी' ओटीटीनंतर आता घरबसल्या पाहता येणार. स्वत: रितेश देशमुखने सांगितली तारीख.
रितेश देशमुख दिग्दर्शित ‘राजा शिवाजी’ या बहुप्रतिक्षित ऐतिहासिक चित्रपटाने मोठ्या पडद्यावर प्रेक्षकांची मनं जिंकल्यानंतर आता छोट्या पडद्यावरही दमदार एंट्री करण्यासाठी सज्ज झाला आहे. हा चित्रपट 1 मे 2026 रोजी प्रेक्षकांच्या भेटीला आला होता. प्रदर्शनानंतर चित्रपटाला प्रेक्षकांकडून भरभरून प्रतिसाद मिळाला.
थिएटरमध्ये यशस्वी ठरल्यानंतर ‘राजा शिवाजी’ काही दिवसांपूर्वी ओटीटी प्लॅटफॉर्मवर प्रदर्शित झाला. त्यामुळे घरबसल्या हा चित्रपट पाहण्याची संधी प्रेक्षकांना मिळाली आहे. आता याच पाठोपाठ चित्रपटाचा वर्ल्ड टेलिव्हिजन प्रीमियर होणार असून, प्रेक्षकांना आपल्या टीव्हीवर हा भव्य ऐतिहासिक चित्रपट पाहता येणार आहे.
‘राजा शिवाजी’च्या वर्ल्ड टेलिव्हिजन प्रीमियरची घोषणा ‘स्टार गोल्ड’ वाहिनीने केली आहे. ‘शौर्य, संकल्प, स्वराज्य’ अशा दमदार कॅप्शनसह वाहिनीने चित्रपटाच्या टीव्ही प्रीमियरची माहिती दिली आहे.
येत्या 12 सप्टेंबर रोजी रात्री 8 वाजता ‘स्टार गोल्ड’ वाहिनीवर ‘राजा शिवाजी’चा वर्ल्ड टेलिव्हिजन प्रीमियर पाहता येणार आहे. विशेष म्हणजे हा चित्रपट प्रेक्षकांना हिंदी आणि मराठी अशा दोन्ही भाषांमध्ये पाहता येणार आहे.
याबाबत स्वतः रितेश देशमुखनेही माहिती दिली आहे. 'राजा शिवाजी हा आमचा सिनेमा टीव्हीवर पहिल्यांदाच येतोय. 12 सप्टेंबर रोजी रात्री 8 वाजता तुम्ही हा चित्रपट पाहू शकता. वर्ल्ड टीव्ही प्रीमियरमध्ये हा सिनेमा हिंदी आणि मराठी अशा दोन्ही भाषांमध्ये पाहता येईल. रिमोटद्वारे तुम्हाला भाषेचा पर्याय बदलता येईल' असं रितेशने सांगितलं.
