प्राण्यांवर आधारित सुपरहिट गाणं, 55 वर्षांपासून लोकप्रिय, ऐकताच प्रत्येकाच्या डोळ्यात येतं पाणी
माणसांसाठी नाही तरी प्राण्यांसाठी मोहम्मद रफी यांनी गायलेलं गाणं. 55 वर्षांनंतर देखील प्रचंड लोकप्रिय. आजही हे गाणं ऐकताना अनेकांच्या डोळ्यात येते पाणी.
बॉलिवूडमधील अनेक जुनी गाणी आजही रसिकांच्या मनावर अधिराज्य गाजवत आहेत. 1971 मध्ये प्रदर्शित झालेल्या 'हाथी मेरे साथी' या चित्रपटातील 'नफरत की दुनिया को छोड़ के, प्यार की दुनिया में खुश रहना मेरे यार' हे असेच एक अजरामर गाणं आहे.
विशेष म्हणजे हे गाणे सुरुवातीला गायक किशोर कुमार यांनी गाण्यास नकार दिला होता. माहितीनुसार, हे गाणं प्रथम किशोर कुमार यांच्यासमोर ठेवण्यात आले. मात्र, या गाण्याचा गंभीर आणि भावनिक आशय त्यांच्या गायकीच्या शैलीशी पूर्णपणे जुळत नसल्याचे त्यांना वाटले. त्यामुळे त्यांनी संगीतकार जोडी लक्ष्मीकांत-प्यारेलाल यांना हे गाणे मोहम्मद रफी यांनी गायल्यास अधिक प्रभावी ठरेल असा सल्ला दिला.
त्या काळात राजेश खन्ना यांच्या बहुतांश चित्रपटांमध्ये किशोर कुमार यांचा आवाज प्रेक्षकांची खास पसंती बनला होता. त्यामुळे या गाण्यासाठी दुसऱ्या गायकाची निवड करण्याच्या प्रस्तावाने राजेश खन्ना यांनाही सुरुवातीला आश्चर्य वाटले.
मात्र, किशोर कुमार यांनी या गाण्यातील भावनिक खोली रफी यांच्या आवाजातून अधिक प्रभावीपणे व्यक्त होईल, असे त्यांना समजावून सांगितले. अखेरीस हे गाणे मोहम्मद रफी यांनी गायले आणि ते हिंदी चित्रपटसृष्टीतील सर्वाधिक भावस्पर्शी गीतांपैकी एक ठरले.
'हाथी मेरे साथी' हा चित्रपटही प्रचंड गाजला. आजही हे गाणं ऐकताना अनेक श्रोत्यांच्या डोळ्यांत पाणी येते आणि मोहम्मद रफी यांच्या भावपूर्ण गायकीची आठवण ताजी होते.
