48 वर्षांपूर्वी रेखाने अमिताभ यांच्या मिठीत सोडलेला जीव, थिएटरमध्ये प्रचंड रडलेले प्रेक्षक, जया बच्चनही झालेल्या भावूक
48 वर्षांपूर्वी रेखाने अमिताभ बच्चन यांच्या मिठीत सोडले होते प्राण, थिएटरमध्ये प्रत्येक व्यक्तीच्या डोळ्यात आले होते पाणी. चित्रपटाने कमाईमध्ये मोडलेले अनेक रेकॉर्ड.
हिंदी चित्रपटसृष्टीत जेव्हा सुपरहिट ऑन-स्क्रीन जोड्यांचा उल्लेख केला जातो तेव्हा अमिताभ बच्चन आणि रेखा यांची जोडी सर्वात प्रथम लक्षात येते. या दोघांनी मर्यादित काळ एकत्र काम केलं असलं तरी त्यांच्या अभिनयाची जादू आजही प्रेक्षकांच्या मनात कायम आहे.
चाहत्यांना आजही ही जोडी पुन्हा पडद्यावर पाहण्याची इच्छा आहे, मात्र आता ते शक्य नाही. अमिताभ बच्चन आणि रेखा यांनी सुमारे 10 चित्रपटांमध्ये एकत्र काम केलं. मात्र, त्यापैकी 1978 मध्ये प्रदर्शित झालेला 'मुकद्दर का सिकंदर' हा चित्रपट विशेष ठरला.
या चित्रपटाने थिएटरमध्ये अक्षरशः धुमाकूळ घातला आणि बॉक्स ऑफिसवर मोठं यश मिळवलं. या चित्रपटातील अमिताभ आणि रेखा यांची केमिस्ट्री इतकी प्रभावी होती की प्रेक्षक पूर्णपणे कथेत हरवून गेले. यामधील एक भावनिक सीन ज्यात रेखा अमिताभ यांच्या मिठीत प्राण सोडते. हा सीन पाहून अनेक प्रेक्षकांना अश्रू अनावर झाले.
असंही म्हटलं जातं की, चित्रपटाच्या स्क्रीनिंगदरम्यान जया बच्चन याही हा सीन पाहून भावूक झाल्या होत्या. याबाबतचा खुलासा स्वतः रेखा यांनी एका मुलाखतीत केला होता. हा चित्रपट त्या वर्षातील सर्वाधिक कमाई करणाऱ्या चित्रपटांपैकी एक होता.
या चित्रपटात रेखाने ‘जोहरा’ ही भूमिका साकारली होती, जी आजही लक्षात राहणारी ठरली. त्याचप्रमाणे ‘सलाम-ए-इश्क मेरी जान’ हे गाणंही प्रचंड गाजलं. एकूणच, हा चित्रपट केवळ बॉक्स ऑफिस हिट नव्हता तर भावनिक कथानक, दमदार अभिनय आणि संगीतामुळे आजही एक क्लासिक म्हणून ओळखला जातो.
