गणपती बाप्पाच्या भक्तीत रमली रिंकू राजगुरू; मनमोहक रूप पाहून चाहतेही म्हणाले, किती सुंदर!
Rinku Rajguru: या फोटोंमधील रिंकू राजगुरूचा पारंपरिक आणि प्रसन्न अंदाज चाहत्यांना अधिक भावला आहे. त्यामुळे तिचं हे गणपती स्पेशल फोटो सध्या सोशल मीडियावर चर्चेचा विषय ठरत आहेत.
गणेशोत्सवाचा उत्साह सर्वत्र पाहायला मिळत असताना अनेक सेलिब्रिटी आपल्या घरातील बाप्पाचे फोटो आणि व्हिडीओ सोशल मीडियावर शेअर करत आहेत. अशातच एका लोकप्रिय मराठी अभिनेत्रीनेही गणपती बाप्पासोबतचे काही खास फोटो चाहत्यांसोबत शेअर केले आहेत.
ही अभिनेत्री दुसरी तिसरी कोणी नसून रिंकू राजगुरू आहे. या फोटोंमध्ये तिचा पारंपरिक अंदाज दिसत असून, तिच्या साध्या पण तितक्याच लूकने चाहत्यांचं लक्ष वेधून घेतलं आहे.
रिंकूने इन्स्टाग्रामवर शेअर केलेल्या फोटोंमध्ये ती निळ्या रंगाच्या सुंदर साडीत दिसत आहे. केस मोकळे ठेवत, कपाळावर छोटीशी टिकली आणि हातात निळ्या बांगड्या असा तिचा पारंपरिक लूक आहे. या लूकमध्ये तिचं सौंदर्य अधिकच खुलून दिसत आहे.
तिच्या या फोटोंमधील सर्वात खास गोष्ट म्हणजे तिच्या हातातील गणपती बाप्पाची मूर्ती. गणपती बाप्पाची सुंदर मूर्ती हातात घेऊन रिंकूने कॅमेऱ्यासमोर हसत पोझ दिली आहे. तिच्या चेहऱ्यावरचा आनंद आणि बाप्पाबद्दलची श्रद्धा या फोटोंमधून स्पष्टपणे जाणवते.
‘गणपती बाप्पा मोरया! मंगलमूर्ती मोरया! बाप्पा प्रत्येकाच्या घरात आनंद घेऊन येऊ दे’ असं कॅप्शन देत रिंकूने हे खास फोटो शेअर केले आहेत. आपल्या घरातच नव्हे तर प्रत्येकाच्या आयुष्यात बाप्पाने आनंद, सुख आणि समृद्धी आणावी, अशी भावना तिने या पोस्टमधून व्यक्त केली आहे.
रिंकूच्या या पोस्टवर चाहत्यांनीही भरभरून प्रेमाचा वर्षाव केला आहे. अनेकांनी कमेंटमध्ये तिला गणेश चतुर्थीच्या शुभेच्छा दिल्या आहेत. काही चाहत्यांनी तिच्या सौंदर्याचं कौतुक केलं, तर काहींनी बाप्पाच्या मूर्तीचं आणि तिच्या पारंपरिक लूकचं कौतुक केलं आहे.
