‘या’ गोष्टींमुळे प्रतापराव जाधवांच्या बोलण्याला बळ मिळतय, उद्धव ठाकरेंवर करण्यात आलेल्या शंभर कोटींच्या आरोपांवर शेलारांची प्रतिक्रिया

मुंबई: भाजप नेते आशिष शेलार (Ashish Shelar) यांनी पुन्हा एकदा शिवसेनेवर (Shiv sena) जोरदार हल्लाबोल केला आहे. सचिन वाझे हे शिवसेनेचेच कार्यकर्ते होते असं शेलार यांनी म्हटलं आहे. वाझे यांना पुन्हा पोलीस दलात कसे घेण्यात आले? त्यासाठी दबाव कोणी टाकला? कोणी विशेष प्रयत्न केले हे सर्व कोर्टाच्या रेकॉर्डवर आहे. तसेच सचीन वाझे हे शिवसेनेचे कार्यकर्ते होते हे देखील स्पष्ट आहे. या दोन्ही गोष्टींमध्ये उद्धव ठाकरे (Uddhav Thackeray) हे मुख्यमंत्री असताना उद्धव ठाकरे यांच्या शिवसेनेचाच हात दिसतो. त्यामुळे प्रतापराव जाधव यांच्या बोलण्याला बळ मिळतंय असं शेलार यांनी म्हटलं आहे. आता शेलार यांच्या टीकेला शिवसेना काय प्रत्युत्तर देणार हे पहाण महत्त्वाचं ठरणार आहे.

प्रतापराव जाधवांचा आरोप काय?

प्रतापराव जाधव यांनी उद्धव ठाकरेंवर घणाघाती आरोप केले आहेत. मातोश्रीवर दर महिन्याला शंभर कोटी जायचे. सचिन वाझे हे पैसे देण्याचे काम करायचे असं प्रतापराव जाधव यांनी म्हटलं आहे. प्रतापराव जाधव यांच्या आरोपानंतर राजकीय वातावरण चांगलचं तापलं असून, पुन्हा एकदा आरोप-प्रत्यारोपाला सुरुवात झाली आहे. या वादात आता भाजप नेते आशिष शेलार यांनी उडी घेतली असून, उद्धव ठाकरे यांच्यावर आरोप केला आहे. तर दुसरीकडे शिवसेनेच्या माजी महापौर किशोरी पेडणेकर यांनी जाधवांच्या आरोपांना प्रत्युत्तर दिले आहे.

काय म्हणाल्या  पेडणेकर?

पेडणेकर यांनी  प्रतापराव जाधवांना खोचक टोला लगावला आहे. सध्या खालच्या स्थरावर आरोप केले जात आहे. मात्र यात किती तथ्य असते हे तपासावे लागेल. आम्ही आमच्या कामाच्या माध्यमातून त्यांना उत्तर देऊ असं पेडणेकर यांनी म्हटलं आहे.