शिवसेनेचे एकमेव केंद्रीय मंत्री पराभूत

अलिबाग : शिवसेनेचे एकमेव केंद्रीय मंत्री असलेले अनंत गीते पराभूत झाले आहेत. रायगड लोकसभा मतदारसंघातून अनंत गीते निवडणुकीच्या रिंगणात होते. मात्र, राष्ट्रवादीचे राष्ट्रीय सरचिटणीस आणि माजी प्रदेशाध्यक्ष सुनील तटकरे यांनी अनंत गीते यांचा पराभव केला.

अनंत गीते यांनी रायगड लोकसभा मतदारसंघातून 2009 आणि 2014 साली विजय मिळवला होता. 2014 साली अनंत गीते यांनी राष्ट्रवादीचे तत्कालीन प्रदेशाध्यक्ष सुनील तटकरे यांना पराभूत केले होते. त्यावेळी अनंत गीते हे केवळ 2100 मतांनी विजयी झाले होते. यंदा सुनील तटकरे यांनीच अनंत गीते यांना पराभूत करुन, गेल्यावेळीच्या पराभवाचा वचपा काढला.

अनंत गीते हे भाजप्रणित एनडीए सरकारच्या केंद्रीय मंत्रिमंडळात मंत्री होते. त्यांच्याकडे केंद्रीय अवजड उद्योग मंत्रालयाची जबाबदारी देण्यात आली होती. शिवसेनेकडून केंद्रीय मंत्रिमंडळात अनंत गीते यांच्या रुपाने केवळ एकच मंत्री होता. अखेर त्यांचाही पराभव झाला आहे.

अनंत गीते हे अत्यंत निष्ठावान आणि जुने शिवसैनिक मानले जातात. पक्षाशी एकनिष्ठ राहिलेल्या अनंत गीते यांना 2014 साली शिवसेनेकडून केंद्रीय मंत्रिपदी विराजमान करण्यात आले. शिवसेनेला केंद्रात एकच मंत्रिपद एनडीएकडून देण्यात आले. त्या मंत्रिपदाची माळ शिवसेनेने अनंत गीते यांच्या गळ्यात घातली होती. शिवसेनेतील विश्वासू चेहरा आणि जबाबदारी शिवसैनिक म्हणून त्यांची ओळख आहे.