शिवसेनेचे मंत्रिपदाचे चारही दावेदार पराभूत!

मुंबई : लोकसभेचे निकाल जाहीर झाले आहेत. महाराष्ट्रासह देशभरात भाजपप्रणित एनडीएला तुफान यश मिळालं आहे. एनडीएतील महाराष्ट्रातील महत्त्वाचा मित्रपक्ष असलेल्या शिवसेनेलाही राज्यात चांगल्या जागा मिळाल्या. मात्र, यंदा शिवसेनेच्या चार अशा उमेदवारांचा पराभव झाला, जे शिवसेनेकडून केंद्रात मंत्रिपदाचे दावेदार मानले जातात. विशेष म्हणजे, हे चारही दावेदार विद्यमान खासदार होते. त्यामुळे त्यांचा पराभव शिवसेनेच्या जिव्हारी लागणारा आहे.

अनंत गीते

अनंत गीते हे रायगड लोकसभा मतदारसंघातून शिवसेनेचे विद्यमान खासदार होते. अनंत गीते हे 1998 पासून शिवसेनेचे खासदार होते. केंद्रात महत्त्वाची मंत्रिपदंही त्यांनी सांभाळली आहेत. शिवसेनेचे एकनिष्ठ शिवसैनिक म्हणून त्यांची ओळख आहे. मात्र, यंदा राष्ट्रवादी काँग्रेसचे राष्ट्रीय सरचिटणीस सुनील तटकरे यांनी अनंत गीते यांचा पराभव केला.

अनंत गीते 2014 साली लोकसभेत गेल्यानंतर, मोदी सरकारमध्ये केंद्रीय अवजड उद्योगमंत्री झाले. केंद्रात शिवसेनेच्या वाट्याला एकच मंत्रिपद आलं, ते मंत्रिपद सेनेने अनंत गीतेंना दिलं. आता पुन्हा गीते विजयी झाले असते, तर ते पुन्हा एकदा केंद्रीय मंत्रिपदाचे दावेदार असते.

चंद्रकांत खैरे

औरंगाबादमधून सलग चारवेळा खासदार राहिलेले चंद्रकांत खैरे यंदा मात्र पराभूत झाले. औरंगाबादमध्ये चौरंगी लढत झाली. या लढतीत वंचित बहुजन आघाडीचे उमेदवार आणि एमआयएमचे आमदार इम्तियाज जलील यांनी बाजी मारली. चंद्रकांत खैरेंच्या पराभव हा शिवसेनेला मोठा धक्का मानला जातो. कारण औरंगाबादचा खासदार म्हणजे चंद्रकांत खैरे असे समीकरणच गेली 20 वर्षे जुळले होते. मात्र, यंदा हे समीकरण पार विस्कटले आहे.

केंद्रात पुन्हा मोदी सराकर सत्तेत आलं आहे. या सत्तेत शिवसेनेलाही वाटा मिळेल, हे निश्चित. त्यामुळे जी मंत्रिपदं शिवसेनेच्या वाट्याला येतील, त्यासाठी चंद्रकांत खैरेंचं नाव आघाडीवर असतं. याचे कारण चंद्रकांत खैरे हे ‘मातोश्री’चे एकनिष्ठ मानले जातात. तसेच, अनुभवानेही ज्येष्ठ खासदार होते. मात्र, पराभवामुळे त्यांच्या या शक्यतेवर पाणी फेरलं आहे.

आनंदराव अडसूळ

अमरावती लोकसभा मतदारसंघातून शिवसेनेचे ज्येष्ठ नेते आनंदराव अडसूळ पराभूत झाले आहेत. आघाडी पुरस्कृत युवा स्वाभिमान पक्षाच्या उमेदवार नवनीत राणा यांनी अडसूळ यांचा पराभव केला. आनंदराव अडसूळ हे वयाने आणि अनुभवाने ज्येष्ठ नेते आहेत. तसेच, शिवसेनेचे अत्यंत एकनिष्ठ नेते आणि कार्यकर्ता ते खासदार असा त्यांचा प्रवास आहे.

अडसूळ यांच्या पराभवामुळे शिवसेनेतील अत्यंत अनुभवी, ज्येष्ठ खासदार संसदेत नसेल. शिवसेनेला सर्वात मोठा धक्का आहे. आनंदराव अडसूळ जिंकले असते, तर मोदी सरकारच्या आगामी मंत्रिमंडळात त्यांना स्थान मिळण्याची दाट शक्यता होते.

शिवाजीराव आढळराव पाटील

पुण्यातील शिरुर लोकसभा मतदारसंघातून सलग तीनवेळा खासदार असलेले शिवाजीराव आढळराव पाटील यांचा यंदा सिनेअभिनेते डॉ. अमोल कोल्हे यांनी पराभव केला. शिवाजीराव आढळराव पाटील हे कट्टर शिवसैनिक, एकनिष्ठ आणि वयाने-अनुभवाने ज्येष्ठ नेते आहेत. त्यामुळे शिवसेनेकेडून कायम शिरुरमधून त्यांना उमेदवारी दिली गेली आणि ते जिंकूनही येत असत. मात्र, यंदा राष्ट्रवादीने पूर्ण ताकद डॉ. अमोल कोल्हे यांच्या पाठीशी उभी केली आणि त्यात अमोल कोल्हे यांचा विजय झाला.

शिरुरमधून पराभव पत्कारावा लागल्याने शिवाजीराव आढळराव पाटलांना संभाव्य मंत्रिपदावरही पाणी फेरावं लागलं आहे. कारण शिवाजीराव आढळराव पाटील जिंकले असते, तर मोदींच्या आगामी मंत्रिमंडळात शिवसेनेकडून त्यांना मंत्रिपद मिळण्याची शक्यता जास्त होती.