“युतीच्या काळात हातात चिमण्या मारण्याची बंदूक, आघाडीने थेट बॉम्बच दिला”

जळगाव : शिवसेनेचे नेते आणि मंत्री गुलाबराव पाटील यांनी युतीच्या सरकारमध्ये आणि महाविकासआघाडीमध्ये मोठा फरक असल्याचं विधान केलं आहे (Difference between Fadnavis and Thackeray Government). तत्कालीन मुख्यमंत्री देवेंद्र फडणवीस यांच्या काळात माझ्या हातात चिमण्या मारण्याची बंदूक देण्यात आली होती. मात्र, आता महाविकासआघाडीच्या काळात मुख्यमंत्री उद्धव ठाकरे यांनी थेट बॉम्ब दिल्याचं मत गुलाबराव पाटील यांनी व्यक्त केलं.

गुलाबराव पाटील यांनी महाविकासआघाडीच्या ठाकरे सरकारमध्ये संधी मिळाल्याबद्दल आभार व्यक्त केले. मंत्रिमंडळ विस्तारात जी संधी मिळाली त्या संधीचं सोनं करणार असल्याचा विश्वासही गुलाबराव पाटील यांनी व्यक्त केला.

एकनाथ खडसे आमच्या संपर्कात : गुलाबराव पाटील

गुलाबराव पाटील यांनी जिल्हा परिषद निवडणुकीची पूर्ण तयारी झाल्याचं सांगत योग्य वेळी संख्याबळ सिद्ध करु, असं म्हटलं आहे. तसेच भाजपचे ज्येष्ठ नेते एकनाथ खडसे आमच्या संपर्कात असल्याचा दावा केला आहे. त्यामुळे राजकीय चर्चेला उधाण आले आहे.

गुलाबराव पाटील म्हणाले, “महाविकासआघाडीची बैठक झाली. जिल्हा परिषद निवडणुकीबाबत या बैठकीत चर्चा झाली. या निवडणुकीत आघाडीचाच उमेदवार असेल. निवडणुकीत आम्ही आमचं संख्याबळ सिद्ध करुन दाखवू. भाजपचे ज्येष्ठ नेते एकनाथ खडसे यांच्यासह भाजपचे अनेक नेते आमच्या संपर्कात आहेत. किती नेते संपर्कात आहेत हे मात्र आज सांगू शकत नाही. जिल्हा परिषदेसाठी आमची तयारी झाली आहे.”

दरम्यान, जळगाव ग्रामीण मतदारसंघातून शिवसेनेचे आमदार असणारे गुलाबराव पाटील त्यांच्या अस्सल गावरानी भाषेतील भाषणांसाठी प्रसिद्ध आहेत. युतीत निवडणूक लढत असताना त्यांनी पंतप्रधान नरेंद्र मोदींच्या सभेच्या वेळी आक्रमक रुप धारण केल्यानंतर त्यांची समजूत काढण्यासाठी भाजपचे संकटमोचक गिरीश महाजन यांना यावे लागल्याचंही याआधी पाहायला मिळालं आहे. मात्र, आता बदललेल्या सत्ता समीकरणांनुसार त्यांनी भाजपला थेट लक्ष्य करण्यास सुरुवात केली आहे.