‘बाळ कुणीही जन्माला घालो, ते आमचेच आहे, ही मानसिकता पूर्वीपासून’, गुलाबराव पाटलांचा भाजपला टोला

अहमदनगर : “राज्य सरकार सगळ्या गोष्टी हळूहळू सुरु करत आहे. कोरोनाचा प्रादुर्भाव वाढू नये यासाठी परिस्थिती बघून मुख्यमंत्री उद्धव ठाकरे यांनी मंदिरं भाविकांसाठी खुली करण्याचा निर्णय घेतला. पण काहीच नसलं तर श्रेय घ्यायचं असतं. बाळ कुणीही जन्माला घालो, ते आमचेच आहे, ही मानसिकता पूर्वीपासून आहे”, असा टोला शिवसेना नेते आणि राज्याते पाणी पुरवठा मंत्री गुलाबराव पाटील यांनी भाजपला लगावला (Gulabrao Patil slams BJP).

गुलाबराव पाटील बुधवारी (18 नोव्हेंबर) साईबाबांचे दर्शन घेण्यासाठी शिर्डीला आले होते. मंदिर उघडल्यानंतर शिर्डीत जाऊन साईबाबांचे दर्शन घेणारे ते पहिले कॅबिनेट मंत्री आहेत. दरम्यान, पत्रकारांशी संवाद साधत असताना त्यांना मंदिर उघडण्यावरुन सुरु असेलेल्या श्रेयवादावर प्रश्न विचारण्यात आला. त्यावर त्यांनी भाजपवर मिश्किल टीका केली (Gulabrao Patil slams BJP).

राज्य सरकारने राज्यातील सर्व मंदिरं भाविकांसाठी खुली करण्याचा निर्णय घेतला आहे. या निर्णयानुसार दिवाळी पाडव्यापासून (सोमवार, 16 नोव्हेंबर) राज्यभरातील सर्व मंदिरं भाविकांसाठी खुली करण्यात आली आहेत. राज्य सरकारच्या या निर्णयानंतर भाजपने राज्यभर ढोल-ताशा, घंटानाद करत या निर्णयाचं स्वागत केलं. त्याचबरोबर मंदिर उघडण्यासाठी भाजपने आक्रमक पाऊल उचलल्यानेच सरकारला हा निर्णय घ्यावा लागला, अशा अविर्भावात भाजप नेते बोलत होते. मंदिर उघडल्यानंतर सुरु असलेल्या या श्रेयवादावरुन गुलाबराव पाटील यांनी भाजपवर निशाणा साधला.

दरम्यान, राष्ट्रवादी काँग्रेस नेते एकनाथ खडसे यांच्याबाबत प्रश्न विचारला असता, खडसेंनी महाविकास आघाडी वाढवावी, अशी प्रतिक्रिया गुलाबराव पाटील यांनी दिली. “प्रत्येकाला आपला पक्ष वाढवण्याचा अधिकार आहे. त्यांनी राष्ट्रवादी वाढवावी. मी शिवसेना वाढवणार. मात्र आपण दोघे महाविकास आघाडीचे घटक आहोत हे विसरु नये”, असा चिमटा त्यांनी काढला.

हेही वाचा :

गुपकर आघाडीत काँग्रेसही सहभागी, देशासमोर काँग्रेसला उघडं पाडू : देवेंद्र फडणवीस

तोंड लपवण्यासाठी नितीन राऊतांकडून चुकीचे आकडे, फडणवीसांचा हल्लाबोल