अभिनेत्री जया प्रदा यांचा भाजपमध्ये प्रवेश, आझम खान यांच्याविरुद्ध लढणार?

लखनऊ : सध्या देशभरात लोकसभा निवडणुकीचे वारे वाहत आहेत. त्या पार्श्वभूमीवर विविध नेत्यांची विविध पक्षांमध्ये इनकमिंग-आऊटगोईंग सुरु आहे.  अभिनेत्री आणि समाजवादी पक्षाच्या नेत्या जया प्रदा भाजपमध्ये दाखल झाल्या आहेत. इतकंच नाही तर उत्तर प्रदेशातील रामपूर मतदारसंघातून भाजप जया प्रदा यांना निवडणुकीच्या रिंगणात उतरवणार आहे.  याबाबतची अधिकृत घोषणा लवकरच करण्यात येणार असून, लोकसभेसाठी रामपूरमध्ये अभिनेत्री जया प्रदा आणि समाजवादी पक्षाचे नेते आझम खान यांच्यात थेट लढत होण्याची चिन्हं आहेत.

सध्या उत्तर प्रदेशातील रामपूर मतदारसंघात भाजपचे नैपाल सिंह हे खासदार आहे. परंतु त्यांच्या प्रकृती अस्वास्थ्यामुळे त्यांना भाजपकडून उमेदवारी देण्याबाबत साशंकता व्यक्त करण्यात येत आहे. त्यामुळे रामपूरमधील कार्यकर्त्यांनी नैपाल सिंह यांचा मुलगा सौरभ किंवा अभिनेत्री जया प्रदा यांचं नाव भाजपातील वरिष्ठ नेत्यांनी सुचवले होते. त्याशिवाय गेल्या काही दिवसांपासून रामपूरमध्ये मुस्लिम लोकसंख्या आणि मतं लक्षात घेता भाजप लोकसभेसाठी एका नव्या उमेदवाराच्या शोधात होता. त्यातच कार्यकर्त्यांनी सुचवलेल्या दोन नावांपैकी जया प्रदा यांचे पारडे जड असल्याने, त्यांना भाजपतर्फे लोकसभेचं तिकीट देण्यात येणार आहे.

दरम्यान सूत्रांनी दिलेल्या माहितीनुसार, रामपूरमधून भाजपाकडून जया प्रदा यांच्या नावावर शिक्कामोर्तब करण्यात आले आहे.  आज संध्याकाळपर्यंत याबाबत अधिकृत घोषणा करण्यात येणार आहे.

समाजवादी पार्टीकडून आझम खान यांना रामपूरमधून उमेदवारी देण्यात येणार असल्याने, रामपूरमध्ये थेट जयाप्रदा आणि आझम खान यांच्यात लढत होणार आहे.

संबंधित बातम्या

अमर सिंहांसोबतचे ते फोटो पाहून आत्महत्येचा विचार होता: जया प्रदा