पवार साहेब, तुमच्याकडून ही अपेक्षा नव्हती, पर्रिकरांच्या मुलाचं जाहीर पत्र

पणजी : दिवंगत भाजप नेते मनोहर पर्रिकर यांनी राफेल विमानांचा व्यवहार न पटल्यामुळे संरक्षण मंत्रीपद सोडलं होतं, असा दावा राष्ट्रवादी काँग्रेसचे नेते शरद पवार यांनी केला. यानंतर मनोहर पर्रिकर यांचे चिरंजीव उत्पाल पर्रिकर यांनी पवारांच्या या वक्तव्यावर तीव्र नाराजी व्यक्त केली आहे. माझ्या वडिलांच्या जीवंतपणी ज्याने विचारपूसही केली नाही, त्याने त्यांचं नाव राजकारणासाठी वापरु नये, अशी विनंतीही पर्रिकरांच्या मुलाने केली आहे. शिवाय पवार साहेबांसारख्या ज्येष्ठ नेत्यांकडून या वक्तव्यांची अपेक्षा नाही, असंही त्यांनी म्हटलंय.

पर्रिकरांच्या मुलाचं पत्र

आदरणीय शरद पवार साहेब, तुमचं वक्तव्य ऐकून मला आणि माझ्या कुटुंबाला धक्का बसलाय. राजकारणासाठी आणि निराधार दाव्यांसाठी माझ्या वडिलांचं नाव वापरण्याचा हा आणखी एक दुर्दैवी आणि असंवेदनशील प्रयत्न आहे. माझे वडील जिवंत असताना आणि ते आजाराशी लढत होते तेव्हाही एका नेत्याने स्वार्थाच्या राजकारणासाठी त्यांचं नाव मध्ये ओढलं होतं. त्यावेळी माझ्या वडिलांनी त्यांच्याच शब्दात त्याला उत्तर दिलं होतं.

पवार साहेब, एक ज्येष्ठ नेता म्हणून तुमच्याकडून ही अपेक्षा नाही. पण, आता तुम्ही हे वक्तव्य केलंच आहे, तर मला काही तथ्य तुमच्यासमोर आणायची आहेत. माझे वडील दिल्लीत असो किंवा गोव्यात, त्यांनी प्रामाणिकपणे देशाची सेवा केली. संरक्षण मंत्री असतानाही त्यांनी ऐतिहासिक निर्णय घेतले, जे कायम स्मरणात राहतील आणि राफेल विमानांचा व्यवहार त्यापैकीच एक आहे.

यानंतर जेव्हा गोव्याच्या जनतेने पर्रिकरांना पुन्हा गोव्यात आणण्याची मागणी केली, तेव्हा पर्रिकरांनी जनतेच्या भावना लक्षात घेत पुन्हा राज्यात येण्याचा निर्णय घेतला आणि त्यांनी अखेरच्या क्षणापर्यंत गोव्यातील जनतेची सेवा केली. त्यामुळे ते राफेल व्यवहारामुळे गोव्यात आले हे म्हणणं हा पर्रिकर आणि गोव्यातील जनता यांच्या प्रेमाचा अपमान आहे. एक माजी संरक्षण मंत्री म्हणून तुम्हालाही अनेक गोष्टी माहिती आहेत, पण तुम्ही चुकीच्या माहितीला बळी पडून याचं राजकारण करत आहात.

एक आणखी वाईट वाटतं की ज्याने माझे वडील जिवंत असताना आणि आजाराशी लढा देत असताना साधी विचारपूसही केली नाही, त्याच्याकडूनच वडिलांचं नाव स्वार्थाच्या राजकारणासाठी वापरलं जातंय. आमचं कुटुंब, गोव्याची जनता दुःखामध्ये आहे. आमची तुम्हाला विनंती आहे की अशा कृत्यापासून दूर राहा.

उत्पाल पर्रिकर