TIME मासिकात मोदींचा ‘डिव्हायडर इन चीफ’ उल्लेख, आता मोदी म्हणतात….

नवी दिल्ली : जगप्रसिद्ध टाईम मॅग्झिनने आपल्या कव्हर पेजवर भारताचे पंतप्रधान नरेंद्र मोदी यांना डिव्हायडर इन चीफ म्हटलं होतं. जगभरात टाईमच्या या कव्हर स्टोरीची चर्चा रंगली. पंतप्रधान मोदींनी याबाबत पहिली प्रतिक्रिया दिली आहे. मोदी म्हणाले, “टाईम मॅग्झिन परदेशी आहे. लेखकाने स्वत: आपण पाकिस्तानातील राजकीय कुटुंबातून आल्याचं म्हटलं आहे. त्यांची विश्वासार्हता सांगण्यासाठी इतकंच पुरेसं आहे.”

मोदींवरील डिव्हायडर इन चीफ ही टाईम मॅग्झिनची कव्हर स्टोरी आतिश ताशीर यांनी लिहिली होती. या लेखात आतिश ताशीर यांनी मोदींनी भारतात दुफळी निर्माण केल्याचं म्हटलं होतं. मॉब लिंचिंग, योगी आदित्यनाथ यांना उत्तर प्रदेशचा मुख्यमंत्री करणं, मालेगाव स्फोटातील आरोपी साध्वी प्रज्ञा ठाकूरला उमेदवारी यासारख्या घडामोडींचा उल्लेख आतिश ताशीर यांनी लेखात केला होता. शिवाय India’s Divider in Chief अर्थात भारताला विभागणारा प्रमुख असा उल्लेख मोदींचा केला होता. या कव्हर स्टोरीमध्ये काँग्रेस अध्यक्ष राहुल गांधी यांच्यावरही टीकास्त्र सोडलं होतं.

याच अंकात पंतप्रधान नरेंद्र मोदी यांच्या गेल्या पाच वर्षातील सत्ताकाळाचा आढावाही घेण्यात आला. ‘Can the World’s Largest Democracy Endure Another Five Years of a Modi Government?’ अशा मथळ्याखाली ‘टाईम’मध्ये विशेष रिपोर्ट छापण्यात आला आहे.

टाईम मॅग्झिनने पंतप्रधान मोदींवर यापूर्वीही कव्हर स्टोरी केली होती. त्यावेळी त्या लेखाचं शीर्षक  ‘मोदी इज इंडियाज बेस्ट होप फॉर इकोनॉमिक रिफॉर्म’ असं होतं. 2015 मध्ये हा लेख लिहण्यात आला होता.

दरम्यान, भाजपनेही या लेखावरुन मोदींची प्रतिमा मलिन करण्याचा लेखकाचा प्रयत्न असल्याचा आरोप केला होता. या लेखाचा लेखक आतिश तासीर हे पाकिस्तानातील माजी नेते सलमान तासीर आणि पत्रकार तलवीन सिंह यांचे सुपुत्र आहेत, त्यांचा अजेंडा पाकिस्तानच आहे, असं भाजपने म्हटलं होतं.

संबंधित बातम्या 

मोदी ‘डिव्हायडर इन चीफ’, ‘टाईम’ मासिकाच्या कव्हरपेजची जगभर चर्चा