संपत्तीसाठी नगरसेवकाची जन्मदात्या आईला मारहाण

पालघर : संपत्ती नावावर करुन घेण्यासाठी जन्मदात्या आईला नगरसेवकाने मारहाण केल्याची धक्कादायक घटना पालघरमध्ये घडली आहे. शिवसेना नगरसेवक मकरंद पाटील यांनी हा कारनामा केला. याप्रकरणी मकरंद पाटील, त्यांची पत्नी आणि नगराध्यक्षपदाच्या उमेदवार श्वेता पाटील यांच्याविरोधात मकरंद पाटील यांच्या आईने पालघर पोलिसांत तक्रार दाखल केली आहे.

विद्यमान नगरसेवक मकरंद पाटील यांच्या आई सुचिता पाटील या सेवानिवृत्त मुख्याध्यापिका आहेत.  निवृत्तीनंतर त्यांनी विकासक म्हणून कार्यालय सुरु केलं. पतीच्या आणि स्वतःच्या मेहनतीने त्यांनी आपली मालकी संपत्ती जमवली. मात्र, मकरंद पाटील यांनी कटकारस्थानाने ती सर्व संपत्ती आपल्या नावे केली, अशी तक्रार सुचिता पाटील यांनी केली आहे. या तक्रारीमुळे श्वेता मकरंद पाटील आणि मकरंद पाटील यांच्या अडचणींमध्ये वाढ होण्याची शक्यता आहे.

मकरंद पाटील यांच्या आई आणि श्वेता पाटील यांच्या सासू सुचिता पाटील यांच्या पालघर शहरातील गणपती एन्क्लेव या इमारतीत दोन सदनिका आहेत. त्या सदनिका त्यांनी स्वतःच्या मेहनतीने खरेदी केल्या आहेत. मात्र, मकरंद पाटील यांनी सदनिका खासदार राजेंद्र गावित यांना विकत असल्याचा बनाव करत आपल्याच आईची दिशाभूल केली. त्यांच्याकडून विविध कागदपत्रांवर खोट्या सह्या घेतल्या. इतकंच नाही तर जिवंतपणीच आपल्या आईचं मृत्यूपत्रही मकरंद पाटील यांनी बनवून घेतल्याचा आरोप आहे.

मृत्यूपत्रात त्यांनी आईने सर्व संपत्तीचा वारस म्हणून स्वत:ला देऊ केल्याचा उल्लेख केला आहे. हे सर्व होत असताना सुचिता यांनी मकरंद यांना विरोध केला. त्यामुळे मकरंद पाटील यांनी कार्यालयात स्वतःच्या आईलाच मारहाण केल्याचा आरोप आहे. जोरजबरदस्तीने त्यांची सर्व संपत्ती आपल्या नावे करुन घेतल्याचा आरोप आईने केला आहे.

सुचिता पाटील या व्याधींनी त्रस्त असतानाही आपली सून आणि नागराध्यक्षपदाच्या उमेदवार श्वेता पाटील यांच्या प्रचारासाठी पालघरला आल्या होत्या. तिथे मकरंद यांनी घराची मूळ कागदपत्रे त्यांच्याकडे मागितली. मात्र, सुचिता यांनी कागदपत्र देण्यास मनाई केली. तेव्हा मकरंद यांनी त्यांना भीती दाखविली. याआधी आपल्याला त्यांच्याकडून झालेली मारहाण आणि त्रास लक्षात घेता सुचिता यांनी सर्व कागदपत्रे मकरंद यांना दिली. मात्र, त्यांना आपल्या संपत्तीबाबतच्या कागदपत्रांबाबत शंका आली. त्यामुळे दुय्यम निबंधक नोंदणी कार्यालयाकडे त्या कागदपत्रांची मागणी केली. दस्तऐवज त्यांच्या हातात आल्यानंतर त्यांनी ते तपासले, त्यात त्यांची सर्व संपत्ती मुलगा मकरंद याने स्वत:च्या नावे केल्याचे आढळून आलं. त्यानंतर सुचिता यांनी पालघर पोलीस ठाण्यात तक्रार दाखल केली. तसेच मुलगा मकरंद पाटील, त्याचे साथीदार आणि सून श्वेता पाटीलसह खोट्या सह्या घेणारे डॉ.अभय पागधरे यांच्यावर गुन्हा दाखल करावा अशी मागणीही त्यांनी केली.

“नगराध्यक्षापदाच्या दावेदार असलेल्या उमेदवाराच्या घरातच अशी परिस्थिती असेल, तर ती या जनतेला काय न्याय देऊ शकेल? त्यामुळे जनतेने याचा गांभीर्याने विचार करावा”, असे आवाहनही सुचिता पाटील यांनी पत्रकारांशी बोलताना केले.

शिवसेनेचे नेते एकनाथ शिंदे यांनी पालघरमधील निष्ठावंत शिवसैनिकांच्या आक्रोशाला डावलून पाटील दाम्पत्यावर विश्वास ठेवला होता. त्यांना राष्ट्रवादी काँग्रेसमधून शिवसेनेत घेतलं होतं. मात्र, या प्रकरणानंतर शिंदे काय पाऊल उचलतात याकडे पालघर शिवसैनिकांचं लक्ष लागलं आहे.