VIDEO : राहुल गांधी म्हणाले सर म्हणू नका, विद्यार्थ्यांनी राहुल म्हणून हाक मारली

चेन्नई (तामिळनाडू) : काँग्रेस अध्यक्ष राहुल गांधी यांचा एक व्हिडीओ सध्या सोशल मीडियावर मोठ्या प्रमाणात व्हायरल झाला आहे. राहुल गांधी बुधवारी चेन्नईमधील स्टेला मॅरीस कॉलेजमध्ये एका कार्यक्रमासाठी गेले होते. यावेळी त्यांनी तेथील विद्यार्थ्यांसोबत संवाद साधला. मात्र यावेळी एका विद्यार्थींनीने राहुल गांधी यांना प्रश्न विचारताना सर असे संबोधले. यानंतर राहुल गांधी यांनी “मला सर नका बोलू”, असे सांगितल्यावर तिथे उपस्थित असलेल्या मुलींनी एकच गोंधळ केला. राहुल गांधींच्या या अनोख्या अंदाजामुळे स्टेला मॅरीस कॉलेजच्या विद्यार्थीनी गांधींच्या चाहत्या झाल्या आहेत.

एकूण 30 ते 40 सेकंदाचा हा व्हिडीओ सध्या मोठ्या प्रमाणात सोशल मीडियावर व्हायरल झाला आहे. या व्हिडीओमध्ये दररोज पांढऱ्या कुरत्यामध्ये दिसणारे राहुल गांधी कॉलेज तरुणांसारखे टी-शर्ट आणि जिन्समध्ये दिसत आहे. यामुळे राहुल गांधीच्या व्यक्तिमत्वाचे अनेक विद्यार्थ्यांनींनी यावेळी कौतुकही केले. तसेच देशातील शिक्षण आणि देशातील अनेक महिलांच्या समस्यांवर गांधीनी विद्यार्थ्यांनींशी संवाद साधला.

काँग्रेस अध्यक्ष राहुल गांधी यांनी सांगितले की, माझ्या आईने मला प्रेम आणि विनम्रताबद्दल शिकवले आहे. नेतृत्वाच्या भूमिकेमध्ये जास्त करुन महिला दिसत आहेत. जोपर्यंत भारतातील महिला सत्तेत नाही येणार तोपर्यंत लोकांचा त्यांच्याकडे पाहण्याच्या दृष्टीकोणात बदल नाही होणार, असं त्यांनी यावेळी सांगितले.