‘राज्य सरकारने निर्णय घेतल्याशिवाय वीजबिल भरु नका’, कल्याणचे शिवसेना नगरसेवक दीपेश म्हात्रेंचं आवाहन

ठाणे : भाजप, मनसेनंतर आता सत्ताधारी शिवसेनेच्या पदाधिकाऱ्यांकडूनही वीज ग्राहकांना वाढीव वीजबिल भरु नका, असं आवाहन करण्यात येत आहे. भाजप सत्तेवर असताना वीज दरात वाढ करण्याची परवानगी भाजपनेच दिली होती. पण आता तेच भाजप वाढीव वीजबिल विरोधात ओरडत आहे, असा हल्लाबोल युवासेना नेते दीपेश म्हात्रे यांनी केला (shiv sena corporator appeal people to not pay electricity bill).

वाढीव वीजबिलविरोधात भाजप आणि मनसे हे दोन्ही पक्ष महाविकास आघाडी सरकारविरोधात आक्रमक झाले आहेत. भाजपकडून राज्यभरात वाढीव विजबिलाची होळी करण्यात आली. तसेच मनसेकडून जिल्हाधिकारी कार्यालयावर मोर्चा काढून आंदोलन करण्यात आले. वाढीव वीज बिल भरु नका, असं आवाहन नागरीकांना दोन्ही पक्ष करीत आहेत. त्यानंतर आता शिवसेनेच्या पदाधिकाऱ्याने देखील वाढीव वीजबिल भरु नका, असं आवाहन नागरीकांना केले आहे.

जोपर्यंत सरकार निर्णय घेत नाही. तोपर्यंत नागरिकांनी वीज बिल भरु नये, असं आवाहन शिवसेना नगरसेवक आणि युवा सेना पदाधिकारी दीपेश म्हात्रे यांनी केलं आहे. दरम्यान, दीपेश यांनी भाजपवर निशाणा साधला (shiv sena corporator appeal people to not pay electricity bill).

“2019 मध्ये जेव्हा भाजप सत्तेत होती तेव्हा वीज वितरण कंपनीला वीज दर वाढविण्याची कॅबीनेटमध्ये मंजुरी दिली होती. दर वाढीचा तो निर्णयच एप्रिल 2020 पासून लागू झाला आहे. तो पूढील तीन वर्षांकरीता राहणार आहे. भाजपने दर वाढविले. पण आता तेच ओरडत आहेत”, असा घणाघात दीपेश म्हात्रे यांनी केला.

हेही वाचा : गर्भवती महिलेला रुग्णालयातून बाहेर काढल्याचा वाद, शिवसेना नगरसेवकाने माघार घेत माफी मागितली, डॉक्टरांचा संप मागे