विदर्भातील हायप्रोफाईल मतदारसंघ, ज्यांच्याकडे देशाचं लक्ष

नागपूर: देशभरात लोकसभा निवडणुकीची लगबग सुरु आहे. सर्वच मतदारसंघात राजकीय पक्ष आणि संभाव्य उमेदवार कामाला लागले आहेत. पण यापैकी हायप्रोफाईल मतदारसंघाकडे अवघ्या देशाच लक्ष लागलं आहे. यात विदर्भातील नागपूर, रामटेक, भंडारा-गोंदिया आणि चंद्रपूर, या चारंही हायप्रोफाईल लोकसभा मतदारसंघाकडे अवघ्या सर्वांचं लक्ष लागलं आहे.

विदर्भातील हायप्रोफाईल लोकसभा

लोकसभा निवडणुकीत हायप्रोफाईल मतदारसंघ नेहमीच चर्चेत असतात. या मतदारसंघातील हालचाली आणि निकालाकडे अवघ्या देशाचं लक्ष लागलेलं असतं. यंदाच्या लोकसभा निवडणुकीतंही विदर्भातील चार मतदारसंघाकडे देशाचं लक्ष आहे.

नागपूर लोकसभा

केंद्रातील दिग्गज मंत्री नितीन गडकरी यांचा नागपूर लोकसभा मतदारसंघ, शिवाय भाजपची मातृशाखा असलेल्या राष्ट्रीय स्वयंसेवक संघाचं मुख्यालय असल्याने, नागपूर भाजपसाठी देशात सर्वात महत्त्वाचा मतदारसंघ आहे, गडकरी आणि संघाचं मुख्यालय असल्याने नागपूर लोकसभा मतदारसंघाकडे अवघ्या देशाचं लक्ष लागलंय. या मतदारसंघात भाजपचं पारडं जड असून काँग्रेसनंही कंबर कसली आहे.

पण या मतदारसंघात आता नवा ट्विस्ट आल्याने इथे काट्याची लढत होणार आहे. कारण काँग्रेसने थेट माजी खासदार नाना पटोले यांना मैदानात उतरवलं आहे.

रामटेक लोकसभा

कधीकाळी देशाला पंतप्रधान देणारा रामटेक मतदारसंघ. माजी केंद्रीय मंत्री आणि काँग्रेसचे महासचिव मुकुल वासनीक यांच्या रामटेक मतदारसंघाकडेही देशाचं लक्ष लागलं आहे. रामटेक मतदारसंघात शिवसेना विरुद्ध काँग्रेस अशी लढत होणार आहे.

रामटेकमध्ये शिवसेनेचे विद्यमान खासदार कृपाल तुमाणेंविरुद्ध काँग्रेस कोणाला उमेदवारी देणार त्यावर इथली लढत अवलंबून आहे.

भंडारा-गोंदिया लोकसभा

राष्ट्रवादी काँग्रेसचे खासदार प्रफुल्ल पटेल देशातील राजकारणातलं एक मोठं नाव. भंडारा-गोंदिया लोकसभा मतदारसंघ हा त्यांचा बालेकिल्ला आहे. सोळाव्या लोकसभा निवडणुकीत भाजपच्या नाना पटोलेंनी त्यांच्या गडाला हादरा दिला होता, पण नाना पटोलेंच्या काँग्रेस प्रवेशानं प्रफुल्ल पटेल यांचा मार्ग काहीसा सोपा झाला आहे. प्रफुल्ल पटेलांमुळे भंडारा-गोंदिया हा देशातील हायप्रोफाईल मतदारसंघ असून, इथे भाजप- राष्ट्रवादी यांच्यात थेट लढत होणार आहे.

चंद्रपूर लोकसभा

चंद्रपूर हा केंद्रीय गृहराज्यमंत्री हंसराज अहिर यांचा मतदारसंघ आहे. हंसराज अहिर भाजपचे उमेदवार असल्यामुळेच चंद्रपूर लोकसभा मतदारसंघाकडेही देशाचं लक्ष लागलेलं आहे. या मतदारसंघात भाजप विरुद्ध काँग्रेस अशी थेट लढत होणार आहे.

दिग्गज नेत्यांमुळे विदर्भातील नागपूर, रामटेक, चंद्रपूर आणि भंडारा-गोंदिया या मतदारसंघाकडे देशाचं लक्ष लागलं आहे. या हायप्रोफाईल मतदारसंघातला पराभव नक्कीच त्या पक्षाला जिव्हारी लागणारा ठरु शकतो. त्यामुळेच या मतदारसंघात विजय मिळावा म्हणून पक्षानं संपूर्ण ताकद पणाला लावली आहे.