वीरेंद्र सेहवाग हरियाणातून लोकसभा निवडणूक लढवणार?

चंदीगड: टीम इंडियाचा माजी स्फोटक फलंदाज वीरेंद्र सेहवाग राजकारणात उतरणार असल्याची चर्चा गेल्या काही दिवसांपासून सुरु आहेत. सेहवाग हरियाणामधून आगामी 2019 लोकसभा निवडणूक लढण्याची शक्यता आहे. महत्त्वाचं म्हणजे सेहवागच्या उमेदवारीसाठी भाजप प्रयत्नशील आहे. रोहतकमध्ये भाजप सेहवागला उमेदवारी देण्याच्या तयारीत आहे. काँग्रेसचे दिग्गज नेते दीपेंद्रसिंह हुड्डा यांच्याविरोधात सेहवागला उतरवून भाजप नवा डाव टाकण्याच्या तयारीत आहे.

लोकसभा निवडणूक 2019 बाबत रविवारी भाजपच्या कोअर कमिटीची बैठक झाली. या बैठकीत रोहतकमध्ये काँग्रेसचे दिग्गज नेते दीपेंद्रसिंह हुड्डा यांना मात देण्यासाठी सेहवागच्या नावाची चर्चा झाल्याची माहिती, एका भाजप नेत्याने दिली. मात्र हरियाणा भाजप अध्यक्ष सुभाष बराला यांनी सेहवागच्या उमेदवारीच्या चर्चेबाबत इन्कार केला. सेहवाग तर भाजपमध्ये सहभागीही झालेला नाही, असं बराला म्हणाले.

दुसरीकडे भाजपच्या विश्वसनीय सूत्रांनी दिलेल्या माहितीनुसार, भाजपच्या एका वरिष्ठ नेत्याला सेहवागपर्यंत ही ऑफर पोहोचवण्याची जबाबदारी दिली आहे. सेहवागबाबत पक्षाने निर्णय घेतला आहे, आता सेहवागने निर्णय घ्यायचा आहे, असं या भाजप नेत्याने सांगितलं.

हंसराज हंसच्या नावाचीही चर्चा वीरेंद्र सेहवागशिवाय सुफी गायक हंसराज हंसच्या नावाचीही भाजपचा संभाव्य उमेदवार म्हणून चर्चा आहे. हंसराज हंस नुकतंच काँग्रेस सोडून भाजपमध्ये सहभागी झाले आहेत. सिरसा लोकसभा मतदारसंघात ते भाजपचे उमेदवार असू शकतात. भाजपने 2014 च्या लोकसभा निवडणुकीत ही जागा गमावली होती.

‘ही केवळ सोशल मीडियावरील चर्चा’ दरम्यान, आम्ही अद्याप 2019 च्या निवडणुकीची प्रक्रिया सुरु केली नाही, असं सुभाष बराला यांनी सांगितलं. हंसराज हंस एक नेते आहेत, मात्र सेहवागने अद्याप पक्षात प्रवेश केलेला नाही. या सर्व चर्चा केवळ सोशल मीडियावरच सुरु आहेत, असं ते म्हणाले.

लोकसभेच्या 2014 च्या निवडणुकीत भाजपने हरियाणातील 10 पैकी 7 जागा जिंकल्या होत्या. हिसार आणि सिरसा या मतदारसंघात आयएनए लढली होती, तर रोहतकमध्ये काँग्रेसने विजय मिळवला होता.

संबंधित बातम्या 

धक धक गर्ल पुण्यातून लोकसभेच्या रिंगणात?