मुंबईतल्या सहाच्या सहा जागा युतीकडे, पाहा कुठल्या जागेवर कोण विजयी?

मुंबई : लोकसभा निवडणुकीचे निकाल हाती आले आहेत. मुंबई जिल्ह्यात एकूण सहा लोकसभा मतदारसंघ येतात. उत्तर मुंबई, उत्तर मध्य मुंबई, उत्तर पश्चिम मुंबई, दक्षिण मध्य मुंबई, उत्तर पूर्व मुंबई, दक्षिण मुंबई या सहा मतदारसंघाचा यात समावेश होतो. विविध जाती-धर्म-भाषेचे लोक मुंबईत राहतात. त्यामुळे कुठलेही नेमके अंदाज बांधता येत नसलेल्या मुंबईत यंदाही प्रत्येक मतदारसंघात ‘काँटे की टक्कर’ पाहायला मिळाली. आता मुंबईतल्या सहाही जागांचे निकाल हाती आले आहेत.

उत्तर मुंबई : उत्तर मुंबईतून गोपाळ शेट्टींनी विजय मिळवला आहे. भाजपचे गोपाळ शेट्टी आणि काँग्रेसच्या उर्मिला मातोंडकर यांच्यात प्रामुख्याने उत्तर मुंबईत लढत झाली. गोपाळ शेट्टी यांनी गेल्यावेळी मुंबई काँग्रेसचे माजी अध्यक्ष संजय निरुपम यांना पराभूत करत विक्रमी फरकाने विजय मिळवला होता.

उत्तर पश्चिम मुंबई : उत्तर पश्चिम मुंबईतून यंदा गजानन कीर्तीकर बाजी मारली आहे. शिवसेनेचे ज्येष्ठ नेते गजानन किर्तीकर आणि मुंबई काँग्रेसचे माजी अध्यक्ष संजय निरुपम यांच्यात लढत झाली. संजय निरुपम गेल्यावेळी उत्तर मुंबईतून रिंगणात होते. तिथे भाजपच्या गोपाळ शेट्टींनी पराभव केल्यानंतर निरुपम यंदा उत्तर पश्चिममधून रिंगणात उतरले होते.

उत्तर मध्य मुंबई : अत्यंत चुरशीच्या ठरलेल्या उत्तर मध्य मुंबईतून अखेर प्रिया दत्त यांनी विजय मिळवला आहे. विद्यमान खासदार पूनम महाजन विरुद्ध माजी खासदार प्रिया दत्त यांच्यात झालेल्या या लढतीकडे सर्वांचं लक्ष लागलं होतं. मराठी मतांसह परप्रांतीय आणि मुस्लीम मतांची लक्षणीय संख्या असलेल्या या मतदारसंघावर पहिल्यापासूनच काँग्रेसचा वरचष्मा राहिला होता. मात्र, 2014 साली मोदीलाटेत पूनम महाजन यांनी काँग्रेसच्या प्रिया दत्त यांचा पराभव केला होता.

दक्षिण मध्य मुंबई : शिवसेनेचे विद्यमान खासदार राहुल शेवाळे विरुद्ध काँग्रेसचे माजी खासदार एकनाथ गायकवाड यांच्यात झालेल्या लढतीत अखेर राहुल शेवाळे यांनी बाजी मारली आहे. धारावीसारखा झोपडपट्टी भाग या मतदारसंघात येत असल्याने, तेथील मतांचा प्रभाव विजयावर नेहमीच जाणवतो. गरीब आणि मध्यमवर्गीयांचे मुद्दे घेऊन या मतदारसंघातील निवडणूक झाली.    

उत्तर पूर्व मुंबई : भाजपचे मनोज कोटक आणि राष्ट्रवादी काँग्रेसचे संजय दीना पाटील यांच्यात झालेल्या या अत्यंत चुरशीच्या लढतीत अखेर मनोज कोटक यांनी विजय मिळवला. विद्यमान खासदार किरीट सोमय्या यांचं शिवसेनेच्या दबावानंतर भाजपने तिकीट कापलं. त्यामुळे या मतदारसंघाकडे सगळ्यांचंच लक्ष वेधलं गेलं होतं.

दक्षिण मुंबई : मुंबईतील उच्चभ्रू आणि तेवढ्याच प्रमाणात सर्वसामान्य मुंबईकरांचा मतदारसंघ अशी असलेल्या दक्षिण मुंबई मतदारसंघाची यंदाची निवडणूक चुरशीची ठरली होती. शिवसेनेचे विद्यमान खासदार अरविंद सावंत यांना काँग्रेसचे माजी खासदार आणि माजी केंद्रीय मंत्री मिलिंद देवरा यांनी टक्कर दिली. अखेर अरविंद सावंत यांचा विजय झाला.