‘चंद्रकांत पाटलांनी बारामतीतून निवडणूक लढून दाखवावी’

पुणे: सार्वजनिक बांधकाम मंत्री चंद्रकांत पाटील यांनी लोकसभा निवडणुकीपासून राष्ट्रवादी काँग्रेसची कोंडी करण्याची एकही संधी सोडलेली नाही. लोकसभा निवडणुकीत तर ते बारामतीतच तळ ठोकून होते. या पार्श्वभूमीवर राष्ट्रवादीचे नेते अंकुश काकडे यांनी चंद्रकांत पाटलांना आगामी विधानसभा निवडणुकीत बारामतीतून निवडणूक लढवून दाखवावी, असे थेट आव्हान दिले आहे. त्यामुळे आता चंद्रकांत पाटील अंकुश काकडेंचे आव्हान स्वीकारणार का? हे पाहणे औत्सुक्याचे ठरणार आहे.

राष्ट्रवादीचे नेते अंकुश काकडे यांनी एक निवेदन प्रसिद्ध केले आहे. त्यात त्यांनी चंद्रकांत पाटलांचा चांगलाच समाचार घेतला आहे. काकडे म्हणाले, “देशात नवे सरकार आले, राज्यातही निवडणुका होत आहेत. मात्र, भाजप नेत्यांना देशात गांधी घराणे आणि राज्यात पवार घराणे  याशिवाय दुसरे काहीही दिसत नाही. ते उठसुट पवारांवरच टीका करतात, त्यांच्यापुढे इतर कुठलेही प्रश्न शिल्लक राहिलेले दिसत नाही. राज्या दुष्काळ, विद्यार्थ्यांचे प्रश्न, आरक्षण असे महत्त्वाचे प्रश्न आ वासून उभे असताना यांना फक्त बारामतीची काळजी आहे.” यावेळी काकडेंनी चंद्रकांत पाटलांना लोकसभा निवडणुकीत बारामतीकरांनी चांगली चपराक लगावल्याचे म्हटले. तसेच ही चपराक झोंबल्यानेच त्यांनी अजित पवारांची सुपारी घेतली आहे, असाही आरोप केला.

चंद्रकांत पाटील विधान परिषदेतील पदवीधर मतदारसंघातून विजयी होण्यासाठी आवश्यक असलेला कोटाही पूर्ण न करु शकणारे आमदार आहेत, असे म्हणत काकडेंनी चंद्रकांत पाटलांच्या निवडून येण्याच्या क्षमतेवरच प्रश्नचिन्ह उपस्थित केले. तसेच त्यांनी चंद्रकांत पाटलांनी बारामतीटा विषय सोडून द्यावा असे सांगताना ते शक्य नसेल तर बारामतीतून निवडणूक लढवावी, असे आव्हान दिले. ते म्हणाले, “अजित पवारांचे काय करायचे ते बारामतीची जनता ठरवेल. त्याची उठाठेव चंद्रकांत पाटलांनी ठेऊ नये. त्यानंतरही ही उठाठेव करायची असेल, तर त्यांनी बारामतीतून निवडणूक लढवावी. एकदा होऊन जाऊ द्या, “दुध का दुध, पाणी का पाणी”.