Ganesh Visarjan 2026 : गणेश विसर्जनावर पंचकाचे सावट; पंचक काळात गणपती विसर्जन करता येतं का?
Ganesh Visarjan 2026 : यावर्षी गणेश विसर्जनावर पंचकाचे सावट असल्याने भाविकांच्या मनात अनेक प्रश्न निर्माण झाले आहेत. पंचक काळात गणपतीचे विसर्जन करणे योग्य आहे की अयोग्य, विसर्जनासाठी कोणता मुहूर्त योग्य आहे आणि याबाबत ज्योतिषशास्त्रात काय सांगितले आहे, हे जाणून घेऊया.
१४ सप्टेंबरपासून सर्वत्र मोठ्या उत्साहात गणेशोत्सव साजरा होत आहे. गणेश चतुर्थीला बाप्पाचे आगमन मोठ्या धुमधडाक्यात झाले. १० दिवसांच्या या उत्सवाची आता सांगता होणार आहे. सर्वसाधारणपणे पाहिले तर गणेशोत्सवाचा शेवटचा दिवस आज, २३ सप्टेंबर रोजी संपतो. पण गणपती विसर्जन आज नव्हे तर २५ सप्टेंबर रोजी होणार आहे. मात्र, याच दिवशी पंचक सुरू असल्याने अनेकांच्या मनात विसर्जनाबाबत प्रश्न आहेत. पंचक काळात गणपती विसर्जन करता येतं का, हे येथे जाणून घ्या.
पंचांगानुसार, गणेशोत्सव भाद्रपद महिन्याच्या शुक्ल पक्षाच्या चतुर्थीला सुरू होतो. तर त्याची सांगता अनंत चतुर्दशीला होते. अशा परिस्थितीत फक्त १० दिवस पूर्ण झाल्यानंतर गणेश विसर्जनाची तारीख निश्चित करता येत नाही. चतुर्दशीची तारीख पंचांग पाहून ठरवली जाते. पंचांगानुसार, २३ सप्टेंबर रोजी भाद्रपद महिन्याच्या शुक्ल पक्षाची द्वादशी आहे. त्यानंतर त्रयोदशी आणि मग चतुर्दशी येते. त्यामुळे यावेळी गणेश विसर्जन बाराव्या दिवशी होणार आहे.
२५ सप्टेंबरला आहे चतुर्दशी
भाद्रपद महिन्याच्या शुक्ल पक्षाची चतुर्दशी तिथी २४ सप्टेंबर रोजी रात्री ११:१७ वाजता सुरू होत आहे. ही तिथी २५ सप्टेंबर रोजी रात्री ११:०८ वाजेपर्यंत असेल. त्यामुळे, उदय तिथी लक्षात घेऊन, २५ सप्टेंबर रोजी अनंत चतुर्दशी साजरी केली जाईल आणि त्याच दिवशी एका विशेष शुभ मुहूर्तावर गणेश विसर्जन केले जाईल.
पंचक काळात करू शकतो का गणपती विसर्जन?
पंचकाच्या सावटाबद्दल लोकांमध्ये खूप संभ्रम निर्माण होऊ लागतो. खरं तर जेव्हा एखाद्या व्यक्तीचा मृत्यू होतो आणि त्यांच्या अस्थींवर अंत्यसंस्कार केले जातात, तेव्हा पंचक घडते असे मानले जाते. पहिली गोष्ट म्हणजे, हे देवतांना लागू होत नाही. दुसरी गोष्ट म्हणजे, मूर्ती जाळली जात नाही, तर तिचे विसर्जन केले जाते. विसर्जन करताना शरीर पाण्यात विसर्जित केले जाते. येथे पंचकाला काही अर्थ नाही. त्यातही विसर्जन हे देवतांचे विसर्जन आहे. त्यामुळे पंचकाला काही महत्त्व नाही. तुम्ही नक्कीच विसर्जन करू शकता, यासाठी पंचक कालावधी लागू होत नाही. याचा अर्थ असा की, गणेश विसर्जनावर पंचकाचा कोणताही परिणाम होणार नाही. त्यामुळे कुठल्याही भीतीशिवाय गणपती विसर्जन केले जाऊ शकते.
(डिस्क्लेमर : वरील माहिती उपलब्ध स्रोतावरून देण्यात आलेली आहे. याच्या तथ्यांबद्दल आम्ही कुठलाही दावा करीत नाही, तसेच अंधश्रद्धेला दुजोरा देत नाही)
