भारताची ‘फुलराणी’ राजकीय मैदानात, बॅडमिंटनपटू सायना नेहवालचा भाजपप्रवेश

नवी दिल्ली : भारताची ‘फुलराणी’ अर्थात प्रख्यात बॅडमिंटनपटू सायना नेहवाल (Saina Nehwal to Join BJP) राजकारणाच्या ‘कोर्टात’ उतरली आहे. राजधानी दिल्लीत सायना नेहवालने भाजपमध्ये प्रवेश केला. सायनासोबतच तिची बहीण चंद्रांशू हिनेही भाजपचा झेंडा हाती धरला.

सायनाच्या रुपाने आणखी एक क्रीडापटू राजकारणातून सेकंड इनिंग सुरु करत आहे. दिल्ली विधानसभा निवडणुकांच्या तोंडावर सायनाच्या रुपाने भाजपला ‘स्टार प्रचारक’ मिळाला आहे. भाजपचे राष्ट्रीय सरचिटणीस अरुण सिंह, कैलाश विजयवर्गीय आणि इतर नेत्यांच्या उपस्थितीत सायना नेहवालचा भाजपप्रवेश झाला.

क्रिकेटपटू गौतम गंभीरने नुकतीच भाजपच्या तिकीटावर लोकसभा निवडणूक लढवून खासदारकी मिळवली होती. तर कुस्तीपटू योगेश्वर दत्त आणि बबिता फोगाट यांनीही भाजपचा झेंडा हाती धरला आहे. त्यानंतर आता सायनाही भाजपमध्ये नशीब आजमावणार आहे.

Delhi: Badminton Player Saina Nehwal joins BJP in the presence of Party’s National General Secretary Arun Singh pic.twitter.com/uXPSJmDVcn

— ANI (@ANI) January 29, 2020

मोदी सरकारने 2016 मध्ये ‘पद्मभूषण’ने सायना नेहवालचा सन्मान केला आहे. याआधी तिला अर्जुन पुरस्कार (2009), राजीव गांधी खेल रत्न (2009-2010), पद्मश्री (2010) हे सन्मान प्राप्त झाले आहेत.

सायनाने 2015 मध्ये जागतिक क्रमवारीत पहिलं स्थान पटकावलं होतं. हा मान पटकावणारी सायना ही पहिली भारतीय बॅडमिंटनपटू ठरली होती. सायनाने 22 सुपर सीरिज आणि ग्रँडप्रिक्स किताब पटकावले आहेत. 2012 मधील लंडन ऑलिम्पिक्समध्ये कांस्य पदक पटकावलं होतं.

29 वर्षीय सायना नेहवालचा जन्म हैदराबादमध्ये झाला. तिचा पती पारुपल्ली कश्यपही प्रख्यात बॅडमिंटनपटू आहे. सायनाच्या आयुष्यावर लवकरच चित्रपटही येणार आहे. अमोल गुप्ते दिग्दर्शित ‘सायना’ चित्रपटात अभिनेत्री परिणिती चोप्रा मुख्य भूमिका करणार आहे.

Saina Nehwal to Join BJP