CSK vs SRH : सनरायझर्स हैदराबादची चिवट बॉलिंग, चेन्नईच्या 180 धावा, कोण जिंकणार?
Chennai Super Kings vs Sunrisers Hyderabad, IPL 2026 : सनरायझर्स हैदराबाद टीमला विजयासह प्लेऑफमध्ये पोहचायचं असेल तर चेन्नई विरुद्ध प्रत्येक ओव्हरमध्ये 9.05 या रनरेटने धावा कराव्या लागणार आहेत.
सनरायझर्स हैदराबाद टीमच्या गोलंदाजांनी आयपीएल 2026 स्पर्धेतील (IPL 2026) 63 व्या आणि निर्णायक सामन्यात चिवट बॉलिंग करत होम टीम चेन्नई सुपर किंग्सला मोठी धावसंख्या करण्यापासून यशस्वीरित्या रोखलं आहे. चेन्नईने एमए चिदंबरम स्टेडियममध्ये हैदराबादसमोर विजयासाठी 181 धावांचं आव्हान ठेवलं आहे. चेन्नईने 20 ओव्हरमध्ये 7 विकेट्स गमावून 180 धावा केल्या. त्यामुळे आता चेन्नई सामना जिंकून आव्हान कायम राखणार की हैदराबाद सामना जिंकून आपल्यासह गुजरात टायटन्सला प्लेऑफचं तिकीट मिळवून देणार? हे थोड्याच वेळात स्पष्ट होईल. त्यामुळे या सामन्यातील शेवटच्या 20 ओव्हरकडे लक्ष असणार आहे.
चेन्नईची बॅटिंग
चेन्नई सुपर किंग्सचा कॅप्टन ऋतुराज गायकवाड याने टॉस जिंकून बॅटिंगचा निर्णय घेतला. चेन्नईसाठी एकूण 8 फलंदाजांनी बॅटिंग केली. त्यापैकी पहिल्या 7 फलंदाजांना दुहेरी आकडा गाठला. मात्र या 7 पैकी एकालाही चेन्नईसाठी अर्धशतक करता आलं नाही. तर अकील हौसेन याने नाबाद 3 धावा केल्या. हैदराबादच्या गोलंदाजांनी केलेल्या चिवट गोलंदाजीमुळे चेन्नईला फटकेबाजी करता आली नाही.
चेन्नईने पावरप्लेच्या 6 ओव्हरमध्ये 2 विकेट्स गमावून 57 धावा केल्या. त्यानंतर चेन्नईला 7 ते 16 या 10 ओव्हरमध्ये गिअर बदलता आला नाही. चेन्नईने 7 ते 16 ओव्हरमध्ये 2 विकेट्स गमावून 87 धावा जोडल्या. तसेच हैदराबादने शेवटच्या 3 ओव्हरमध्ये अप्रतिम बॉलिंग केली. डावातील शेवटच्या 3 ओव्हर निर्णायक असतात. हैदराबादने याच 3 षटकांत धावांवर ब्रेक लगावला. चेन्नईला या 18 बॉलमध्ये 3 विकेट्स गमावून 36 रन्सच करता आल्या.
चेन्नईसाठी सर्वाधिक धावा कुणाकडून?
दरम्यान चेन्नईसाठी डेवाल्ड ब्रेव्हीस याने सर्वाधिक धावा केल्या. डेवाल्डने 27 बॉलमध्ये 44 रन्स केल्या. कार्तिक शर्मा याने 32 धावांचं योगदान दिलं. शिवम दुबे याने 26 आणि संजू सॅमसन याने 27 धावा केल्या. प्रशांत वीर याने 11, उर्विल पटेल 13 आणि ऋतुराज गायकवाड याने 15 धावा केल्या. तर अकील हौसेन याने नाबाद 3 धावा केल्या. हैदराबादसाठी कॅप्टन पॅट कमिन्स याने सर्वाधिक 3 विकेट्स घेतल्या. साकीब हुसैन याने दोघांना मैदानाबाहेरचा रस्ता दाखवला. तर प्रफुल हिंगे आणि एशान मलिंगा या दोघांनी प्रत्येकी 1-1 विकेट मिळवली.
स्कोअरकार्ड
चेन्नई आणि हैदराबादची कामगिरी
दरम्यान चेन्नईने या हंगामात 12 पैकी 6 सामने जिंकलेत. तर चेन्नईला 6 सामन्यांत पराभूत व्हावं लागलंय. तर हैदराबादने 12 पैकी 7 सामने जिंकले आहेत. तर हैदराबादला 5 सामन्यांत प्रतिस्पर्धी संघाकडून पराभूत व्हावं लागलं आहे.
