मुंबईचा कर्णधार चेन्नईच्या जर्सीत दिसणार? CSK च्या जर्सी नंबर 33 ने वाढवलं गूढ, अश्विनच्या कमेंटने चर्चेला नवं वळण!

आयपीएल 2027 च्या आधी हार्दिक पांड्या चेन्नई संघात सामील होणार असल्याच्या चर्चांना जोर चढला आहे. गेल्या हंगामात हार्दिक पांड्याचे मुंबई संघ व्यवस्थापनासोबतचे संबंध बिघडले होते, असे समोर आले होते. त्यानंतर तो इतर संघांमध्ये सामील होणार असल्याच्या चर्चा सुरू झाल्या आहेत. पण चेन्नई सुपर किंग्सच्या एका पोस्टने या चर्चांना आणखी खतपाणी घातले आहे. अश्विनच्या प्रतिक्रियेमुळे या चर्चा खऱ्या ठरण्याची शक्यता वाढली आहे.

पाच वेळा चॅम्पियन ठरलेल्या चेन्नई सुपर किंग्सच्या एका सोशल मीडिया पोस्टने चाहत्यांचे लक्ष वेधून घेतले आहे. मुंबई इंडियन्सचा कर्णधार हार्दिक पांड्या आगामी हंगामात चेन्नईच्या पिवळ्या जर्सीमध्ये दिसू शकतो, अशी जोरदार चर्चा सुरू आहे. या चर्चेमागे तीन घटक आहेत. पहिला चेन्नईच्या एका प्रमोशनल व्हिडिओमध्ये 33 हा आकडा दिसणे. दुसरा माजी भारतीय क्रिकेटपटू रविचंद्रन अश्विनची गूढ प्रतिक्रिया. तिसरा चेन्नई फ्रँचायझीने रात्री 10:33 वाजता केलेली पोस्ट.

ज्यामध्ये फ्रँचायझीने चाहत्यांना इशारा दिला आहे की, ते गोष्टींचा जास्तच अर्थ लावत आहेत. 27 ऑक्टोबर रोजी चेन्नई सुपर किंग्सने आयपीएल 2027 साठी आपल्या कोचिंग स्टाफचा एक व्हिडिओ शेअर केला. यामध्ये संघाचे नवीन मुख्य प्रशिक्षक, झहीर खान, आणि फ्रँचायझीचा शुभंकर, लिओ, हे दिसत होते. व्हिडिओमध्ये लिओने झहीर खानला संघाच्या तयारीबद्दल आणि खेळाडूंच्या अदलाबदलीबद्दल प्रश्न विचारले. झहीर खानने अदलाबदलीबद्दल कोणतीही विशिष्ट माहिती दिली नाही. मात्र, 33 हा आकडा लिहिलेला एक कागदाचा तुकडा दिसला.

त्यानंतर चाहत्यांनी हा आकडा हार्दिक पांड्याशी जोडायला सुरुवात केली. हार्दिक भारतीय संघ आणि मुंबई इंडियन्ससाठी 33 क्रमांकाची जर्सी घालतो. काही चाहत्यांनी याला चेन्नईसाठी एक संकेत मानले. चेन्नईच्या ‘एक्स’ हँडलवरून रात्री 10:33 वाजता आणखी एक पोस्ट करण्यात आली. तमिळमध्ये लिहिलेल्या या पोस्टमध्ये म्हटले होते की, चाहते प्रत्येक गोष्टीचा अवास्तव अर्थ लावत आहेत. मात्र, चाहत्यांनी पोस्टच्या वेळेकडे लक्ष वेधले.

ही पोस्ट रात्री 10:33 वाजता टाकण्यात आल्यामुळे लोकांनी तिचा संबंध हार्दिकच्या जर्सी क्रमांक 33 शी जोडला. यामुळे असा प्रश्न निर्माण झाला आहे की, चेन्नई जाणूनबुजून असे सूचक अर्थ काढत आहे की चाहते केवळ सामान्य घटनांना या ट्रेडशी जोडून पाहत आहेत. भारताचा माजी फिरकी गोलंदाज रविचंद्रन अश्विनच्या प्रतिक्रियेमुळे हार्दिकच्या ट्रेडच्या चर्चांनाही बळ मिळत आहे.

चेन्नईतील व्हिडिओवरून सुरू असलेल्या अटकळांवर प्रतिक्रिया देताना त्याने लिहिले, “ऑन, प्रॉपर कुकिंग.” जेव्हा काहीतरी रंजक घडत असते किंवा मोठी बातमी अपेक्षित असते, तेव्हा सोशल मीडियावर अनेकदा हा शब्दप्रयोग वापरला जातो. अनेक चाहत्यांनी अश्विनच्या प्रतिक्रियेचा संबंध हार्दिकच्या ट्रेडशी जोडला आहे. चेन्नई सुपर किंग्सचे सीईओ कासी विश्वनाथन यांनी हार्दिकच्या ट्रेडबद्दलच्या अटकळी फेटाळून लावल्या आहेत. त्यांनी सांगितले की, फ्रँचायझीने या प्रकरणी कोणतीही चर्चा केलेली नाही. हंगामानंतरचा आढावा पूर्ण झाल्यावरच पुढील पर्यायांचा विचार केला जाईल. मुंबई इंडियन्सनेही म्हटले आहे की, त्यांचा हंगामानंतरचा आढावा पूर्ण होईपर्यंत ते खेळाडूंच्या ट्रेडवर चर्चा करणार नाहीत.