IPL 2026, CSK vs SRH: संजू सॅमसनकडून अशी अपेक्षा नव्हती! आपल्याच संघाचं नुकसान करून गेला?
आयपीएल 2026 स्पर्धेत चेन्नई सुपर किंग्स प्लेऑफच्या शर्यतीत आहे. त्यामुळे सनरायझर्स हैदराबादविरुद्धचा सामना जिंकणं भाग आहे. असं असताना या सामन्यात संजू सॅमसनने आक्रमक सुरूवात केली. पण संघाचं नुकसान करून गेला.
आयपीएल 2026 स्पर्धेत चेन्नई सुपर किंग्स आणि सनरायर्स हैदराबाद हे संघ आमनेसामने आले आहे. या सामन्यात दोन्ही संघांना विजय महत्त्वाचा आहे. कारण प्लेऑफचं तिकीट मिळवायचं असेल तर विजय काहीही करून हवाच. असं असताना नाणेफेकीचा कौल हा चेन्नई सुपर किंग्सच्या बाजूने लागला. चेन्नई सुपर किंग्सचा कर्णधार ऋतुराज गायकवाडने प्रथम फलंदाजी स्वीकारली. खरं तर हा निर्णय अनेकांसाठी आश्चर्यकारक होता. चेन्नईकडून सलामीला संजू सॅमसन आणि ऋतुराज गायकवाड ही जोडी मैदानात आली. संजू सॅमसनने आक्रमक सुरूवात केली. नितीश रेड्डीच्या गोलंदाजीचा सामना करताना पहिल्या षटकात संजू सॅमसनने स्ट्राईक घेतली. पहिला चेंडू नो बॉल टाकल्याने संजू सॅमसनला आयती संधी मिळाली आणि पुन्हा टाकलेल्या चेंडूवर षटकार मारत डावाची सुरूवात केली. त्यानंतर चौकार मारला आणि शेवटच्या चेंडूवर स्ट्राईक मिळताच चौकाराने हे षटक संपवलं.
सनरायझर्स हैदराबादकडून दुसरं षटक टाकण्यासाठी प्रफुल हिंगे आला. त्याच्या दुसऱ्या चेंडूवर संजू सॅमसनला स्ट्राईक मिळाली. त्यानंतर दोन चेंडू निर्धाव गेले आणि चौथ्या-पाचव्या-सहाव्या चेंडूवर चौकार मारत हेतू स्पष्ट केला. संजू सॅमसनचा आक्रमक पवित्रा पाहून कर्णधार पॅट कमिन्सने तिसरं षटक हाती घेतलं. या षटकात दुसऱ्या चेंडूवर संजू सॅमसनला स्ट्राईक मिळाली. त्याने हा चेंडू निर्धाव घालवला. पण पुढच्या चेंडूवर कट लागून चेंडू विकेटकीपर इशान किशनच्या हाती गेला. पंचांनीही त्याला बाद दिले. पण संजू सॅमसनने रिव्ह्यू घेतला. खरं तर स्पष्टपणे कट लागली होती आणि रिव्ह्यू घेण्याची गरज नव्हती. तरी त्याने तसं केलं. अखेर तिसऱ्या पंचांनी शहनिशा केली आणि बाद असल्याचं जाहीर केलं. यामुळे चेन्नई सुपर किंग्सचा एक रिव्ह्यू वाया गेला. खरं तर हा रिव्ह्यू फुकटचा गेला.
संजू सॅमसनचा खेळ 27 धावांवर आटोपला पण त्याने महेंद्रसिंह धोनीचा एक विक्रम मोडीत काढला. 13 वर्षांपासून महेंद्रसिंह धोनीच्या नावावर हा विक्रम होता. त्याने विकेटकीपर म्हणून सर्वाधिक धावांचा विक्रम मोडीत काढला. महेंद्रसिंह धोनीने 2013 च्या हंगामात 16 डावांमध्ये 461 धावा केल्या होत्या. हा विक्रम मोडण्यासाठी सॅमसनला फक्त 12 धावांची गरज होती. संजू सॅमसनने 13 चेंडूत 27 धावा केल्या आणि हा विक्रम आपल्या नावावर केला. संजू सॅमसनच्या नावावर 13 डावात 477 धावा आहेत.
