LSG vs KKR: लखनौ आणि कोलकात्यासाठी अस्तित्वाची लढाई, नाणेफेकीचा कौल जिंकत पंत म्हणाला…
आयपीएल स्पर्धेतील 38व्या सामन्यात लखनौ सुपर जायंट्स आणि कोलकाता नाईट रायडर्स या संघात सामना होत आहे. या दोन्ही संघाची स्पर्धेतील स्थिती काही चांगली नाही. त्यामुळे स्पर्धेत राहायचं तर सामना जिंकणं भाग आहे. अन्यथा पुढचा प्रवास खूपच कठीण होईल.
आयपीएल 2026 स्पर्धेत लखनौ सुपर जायंट्स आणि कोलकाता नाईट रायडर्स हे संघ लढत आहेत. या सामन्यात विजयी संघाला पुढच्या प्रवासासाठी ताकद मिळणार आहे. त्यामुळे दोन्ही संघ विजयासाठी प्रयत्नशील असणार आहेत. गुणतालिकेत लखनौ सुपर जायंट्स संघ नवव्या, तर कोलकाता नाईट रायडर्स संघ दहाव्या स्थानावर आहे. त्यामुळे स्पर्धेतील दुबळ्या संघांचा हा सामना होत आहे. या सामन्यात कोण बाजी मारणार याची उत्सुकता आहे. नाणेफेकीचा कौल हा लखनौ सुपर जायंट्सच्या बाजूने लागला आणि कर्णधार ऋषभ पंतने प्रथम गोलंदाजी स्वीकारली.
आयपीएल स्पर्धेतील या सामन्यात नाणेफेकीचा कौल जिंकल्यानंतर लखनौ सुपर जायंट्सचा कर्णधार ऋषभ पंत म्हणाला की, आम्ही प्रथम गोलंदाजी करणार आहोत. फक्त एक बदल केला आहे. सिद्धार्थच्या जागी लिंडे संघात येईल. आम्ही त्या दिशेने काम करत आहोत. आम्हाला काहीतरी मार्ग शोधावा लागेल, आम्ही त्याच्या अगदी जवळ पोहोचलो आहोत. आम्हाला माहित आहे की इथून आम्ही या हंगामाला कलाटणी देऊ शकतो, मला पूर्ण विश्वास आहे.
कोलकाता नाईट रायडर्सचा कर्णधार अजिंक्य रहाणे म्हणाला की, आम्ही प्रथम फलंदाजी करण्याच्या विचारात होतो. सध्या एक संघ म्हणून आम्ही कसे खेळत आहोत हे पाहणे महत्त्वाचे आहे. फलंदाजी विभागाला ते स्वातंत्र्य देणे आवश्यक आहे. त्या परिस्थितीचा अंदाज घेणे गरजेचे आहे. आम्ही त्याच संघासोबत खेळणार आहोत. तो विजय खूप चांगला होता. नेहमी सुधारणा करणे महत्त्वाचे असते. काही चांगले सराव सत्र झाले, सामन्याची आतुरतेने वाट पाहत आहे.
दोन्ही संघांची प्लेइंग 11
लखनौ सुपर जायंट्स (प्लेइंग इलेव्हन): एडन मार्कराम, मिचेल मार्श, ऋषभ पंत (विकेटकीपर/कर्णधार), निकोलस पूरन, आयुष बडोनी, मुकुल चौधरी, जॉर्ज लिंडे, मोहम्मद शमी, प्रिन्स यादव, दिग्वेश सिंग राठी, मोहसिन खान.
कोलकाता नाईट रायडर्स (प्लेइंग इलेव्हन): अजिंक्य रहाणे (कर्णधार), टिम सेफर्ट (विकेटकीपर), कॅमेरून ग्रीन, अंगकृष्ण रघुवंशी, रोवमन पॉवेल, रिंकू सिंग, सुनील नरेन, रमणदीप सिंग, अनुकुल रॉय, वैभव अरोरा, कार्तिक त्यागी
