T20i : टीम इंडिया 2 टी 20i सामन्यांसाठी आयर्लंड दौऱ्यावर जाणार, वेळापत्रक जाहीर

आयसीसी टी 20i वर्ल्ड कप 2026 स्पर्धेतील ऐतिहासिक विजयानंतर टीम इंडियाचे खेळाडू आता आयपीएलच्या 19 व्या मोसमात खेळण्यासाठी सज्ज झाले आहेत. आयपीएलच्या 19 व्या मोसमाचा थरार हा 28 मार्च ते मे महिन्याच्या शेवटपर्यंत रंगणार आहे. त्यानंतर टीम इंडिया मायदेशात अफगाणिस्तान विरुद्ध 2 हात करणार आहे. अफगाणिस्तान या भारत दौऱ्यात 6 ते 20 जून दरम्यान 1 कसोटी आणि 3 सामन्यांची एकदिवसीय मालिका खेळणार आहे. उभयसंघात एकदिवसीय मालिका खेळवण्याची ही पहिलीच वेळ ठरणार आहे. रोहित शर्मा आणि विराट कोहली या अनुभवी जोडीचं या मालिकेतून अनेक महिन्यानंतर आंतरराष्ट्रीय क्रिकेटमध्ये कमबॅक होणार आहे. त्यामुळे या मालिकेची साऱ्यांना प्रतिक्षा असणार आहे. त्यानंतर टीम इंडिया आयर्लंड दौऱ्यावर जाणार आहे.

टीम इंडियाचा आयर्लंड दौरा

टीम इंडिया मायदेशातील अफगाणिस्तान विरूद्धच्या मालिकेनंतर इंग्लंड दौऱ्यावर जाणार होती. मात्र त्याआधी टीम इंडिया आयर्लंड दौऱ्यावर जाणार आहे. यजमान या नात्याने आयर्लंड क्रिकेट बोर्डाने याबाबतची माहिती दिली आहे.

आयर्लंडचा अनुभवी फलंदाज पॉल स्टर्लिंग याने 19 मार्च रोजी टी 20i कर्णधारपदाचा राजीनामा दिला. त्यासोबत टीम इंडिया आयर्लंड दौऱ्यावर येणार असल्याचं क्रिकेट बोर्डाने जाहीर केलं. त्यानंतर गेल्या काही तासांपासून टीम इंडिया आयर्लंड दौऱ्यात किती सामने खेळणार? याची चाहत्यांना प्रतिक्षा लागून होती. मीडिया रिपोर्ट्समध्ये, उभयसंघात एकूण 3 टी 20i सामने होणार असल्याची चर्चा होती. मात्र उभयसंघात एकूण किती सामने होणार? याची अधिकृत माहिती समोर आली आहे. आयर्लंड क्रिकेट बोर्डाने एक्स या सोशल मीडिया अकाउंटवरुन याबाबतची माहिती दिली आहे.

आयर्लंडचं मायदेशातील मालिकांचं वेळापत्रक जाहीर

1 मालिका आणि 2 सामने

आयर्लंड विरुद्ध टीम इंडिया यांच्यात टी 20i मालिका होणार आहे. उभयसंघात 26 ते 28 दरम्यान एकूण 2 टी 20i सामने होणार आहेत. सूर्यकुमार यादव टीम इंडियाचा नियमित टी 20i कर्णधार आहे. त्यामुळे सूर्या भारताचं नेतृत्व करेल. मात्र पॉल स्टर्लिंग याच्या राजीनाम्यानंतर आयर्लंडच्या टी 20i संघाच्या कर्णधारपदाची जबाबदारी कुणाला दिली जाते? हे पाहणं महत्त्वाचं ठरणार आहे.

आयर्लंड विरुद्ध टीम इंडिया टी 20i मालिकेचं वेळापत्रक

आयर्लंड विरुद्ध टीम इंडिया, पहिला सामना, 26 जून.

आयर्लंड विरुद्ध टीम इंडिया, दुसरा सामना, 28 जून.